అమరావతిలో ఇన్‌సైడర్ ట్రేడింగ్: వైసీపీ సర్కార్‌కి షాక్

సూట్‌కేసు కంపెనీలు.. వర్సెస్ ఇన్‌సైడర్ ట్రేడింగ్.. ఆంధ్రపదేశ్ రాజకీయాల్లో ఇదొక ఆసక్తకిరమైన రాజకీయ యుద్ధం. వైఎస్ జగన్ మీద అక్రమాస్తుల కేసు నేపథ్యంలో సూట్‌కేసు కంపెనీల వ్యవహారం తెరపైకొచ్చిన విషయం విదితమే. ‘నీకిది నాకది’ అంటూ అడ్డగోలుగా అధికారాన్ని అడ్డంపెట్టుకుని దోచేశారన్నది అక్రమాస్తుల కేసుకు సంబంధించి వినిపించిన ఆరోపణలు, అబియోగాల పర్వం తాలూకు సారాంశం.

తనను అలా విమర్శించడంతో వైఎస్ జగన్‌కి చిర్రెత్తుకొచ్చింది.. అమరావతి భూ కుంభకోణానికి సంబంధించి ‘ఇన్‌సైడర్ ట్రేడింగ్’ అనే ప్రస్తావన తీసుకొచ్చి, అప్పటి చంద్రబాబు ప్రభుత్వంపై వైఎస్ జగన్ అండ్ టీమ్ ఆరోపణలు చేసిన విషయం విదితమే. అధికారంలోకి వచ్చాక వైఎస్ జగన్, ఆ ‘ఇన్‌సైడర్ ట్రేడింగ్’పై స్పెషల్ ఫోకస్ పెట్టారు. కానీ, అసలంటూ ఇన్‌సైడర్ ట్రేడింగ్‌కి అవకాశమే లేదని టీడీపీ ఆరోపిస్తూ వచ్చింది.

తాజాగా, ఈ వ్యవహారానికి సంబంధించి వైఎస్ జగన్ సర్కారుకి ఏపీ హైకోర్టులో షాక్ తగిలింది. ఇన్‌సైడర్ ట్రేడింగ్ ఆరోపణలు ఎదుర్కొంటున్న కిలారి రాజేష్ మరికొందరు వ్యక్తులు హైకోర్టులో క్వాష్ పిటిషన్ దాఖలు చేయగా, ప్రభుత్వం తెరపైకి తెచ్చిన ఇన్‌సైడర్ ట్రేడింగ్ వాదనల్ని హైకోర్టు కొట్టిపారేసింది. భూములు అమ్మినవారెవరూ ఫిర్యాదు చేయకుండా ఇన్‌సైడర్ ట్రేడింగ్ అనే ఆరోపణలు చేయడంలో అర్థమేముందని హైకోర్టు అభిప్రాయపడినట్లు తెలుస్తోంది.

ఇన్‌సైడర్ ట్రేడింగ్‌పై ఐపీసీ సెక్షన్లు వర్తించవని న్యాయస్థానం పేర్కొనడం గమనార్హం. అయితే, చంద్రబాబు హయాంలో అమరావతి పేరుతో భూ దందా జరిగిందన్నది నిర్వివాదాంశం. ఆ సమయంలో చంద్రబాబు సహా అనేక మందిపై తీవ్రమైన ఆరోపణలు చేసిన వైసీపీ, తాము అదికారంలోకి వచ్చాక మాత్రం చిత్ర విచిత్రమైన రాజకీయాల్ని తెరపైకి తెస్తోంది.

మాజీ మంత్రి నారాయణ ఇటీవలి కాలంలో రాజకీయ తెరపై ఎక్కడా కనిపించడంలేదు. అమరావతి భూ కుంభకోణానికి సంబంధించి తీవ్రాతి తీవ్రమైన ఆరోపణల్ని వైసీపీ చేసింది, నారాయణ మీదనే. అధికారంలో ఎవరున్నా అంతిమంగా దోపిడీ అయితే సర్వసాధారణం. ఆయా పార్టీల మధ్య 60-40 ఒప్పందాలే ఇందుక్కారణం. రాజకీయ లబ్ది కోసం ఒకరి మీద ఒకరు ఆరోపణలు చేసుకోవడం తప్ప.. ఆ ఆరోపణపై విచారణ విషయమై అధికారంలో వున్నవారు చూపే చిత్తశుద్ధి నేతి బీరకాయలో నెయ్యి చందమే.