హైకోర్టులో తేలనున్న అమరావతి ఖర్చుల లెక్కలు.!

రాజధాని అమరావతికి సంబంధించి చంద్రబాబు హయాంలో జరిగిన ఖర్చెంత.? అంటూ హైకోర్టు ప్రశ్నించింది. రాజధాని తరలింపు సహా, పలు పిటిషన్లపై విచారణ జరిపిన న్యాయస్థానం ఈ సందర్భంగా రాజధానిలో ఇప్పటికే నిర్మితమయిన, నిర్మాణంలో వున్న, నిర్మాణంలో కావాల్సిన భవనాలకు సంబంధించిన లెక్కల్ని తేల్చాలన్నీ తమ ముందుంచాలని ఆదేశించింది.

‘ఏడాదిగా నిర్మాణాలు ఆపేసినట్లు కన్పిస్తోంది.. మరి, ఇప్పటికే నిర్మాణాలు పూర్తయిన భవనాల్ని ఏం చేద్దామనుకుంటున్నారు.? వాడకంలో లేకపోతే ఆ భవనాలు పాడైపోయే అవకాశం వుంది కదా. అవి ప్రజా ధనంతో నిర్మించిన భవనాలు. ఎవరు జవాబుదారీతనం వహిస్తారు.?’ అని ప్రశ్నించింది న్యాయస్థానం. పూర్తి వివరాలు తమ ముందుంచేలా అకౌంటెంట్‌ జనరల్‌కి నోటీసులు పంపాలని న్యాయస్థానం ఆదేశించింది.

అమరావతికి సంబంధించి ఇది అత్యంత కీలకమైన అంశంగా రాజకీయ పరిశీలకులు భావిస్తున్నారు. రాజధాని అనేది వైఎస్‌ జగన్‌ – చంద్రబాబు మధ్య ఆదిపత్య పోరుకి సంబంధించిన వ్యవహారం కానే కాదు. చంద్రబాబు అయినా, వైఎస్‌ జగన్‌ అయినా.. ఖర్చు చేసిందీ, చేస్తున్నదీ, చేయబోయేదీ ప్రజాధనమే. అలాంటప్పుడు ఒకరి మీద అక్కసుతో ఇంకొకరు కీలకమైన రాజధాని వంటి విషయాల్లో ప్రజా ధనాన్ని దుర్వినియోగం చేస్తే ఎలా.? ‘మేం రాజధానిని మార్చడంలేదు..’ అని వైసీపీ నేతలు బుకాయిస్తున్నా, వైసీపీ అధినేత వైఎస్‌ జగన్‌ ఎన్నికల సమయంలో ‘రాజధాని అంటే ఏంటో ఇచ్చిన వివరణ’ చూస్తే వారికే అసలు విషయం అర్థమవుతుంది.

రాజధాని అంటే అసెంబ్లీ, సెక్రెటేరియట్‌, హైకోర్టు.. కొన్ని ముఖ్యమైన ప్రభుత్వ కార్యాలయాలు.. అని ఇదే వైఎస్‌ జగన్‌ మోహన్‌రెడ్డి గతంలో చెప్పారు. మరి, ఆ రాజధాని నుంచి హైకోర్టుని తరలించి, ఎగ్జిక్యూటివ్‌ క్యాపిటల్‌ని తరలిస్తే.. అమరావతికి మిగిలేదేంటి.? ఇదిలా వుంటే, సుమారు 52 వేల కోట్ల రూపాయల విలువైన ప్రాజెక్టులు రాజధాని అమరావతి నిర్మాణంలో భాగంగా వివిధ దశల్లో వున్నట్లు హైకోర్టు ముందుకు సీఆర్డీయే రికార్డుని న్యాయస్థానం ముందుంచారు న్యాయవాది. దీంట్లో ఇప్పటికే 10 వేల కోట్ల రూపాయలు ఖర్చు చేసినట్లు సాక్షాత్తూ ప్రభుత్వమే చెబుతోందాయె. సో, పూర్తి లెక్కలు న్యాయస్థానం ముందుకొస్తే, అమరావతికి సంబంధించి అధికార వైసీపీ చేస్తోన్న దుష్ప్రచారం బట్టబయలయ్యే అవకాశం వుందన్నది ప్రధాన ప్రతిపక్షం తెలుగుదేశం పార్టీ ఉవాచ.