ఎమ్మెల్యే పదవికి ఈటెల రాజీనామా.. కండిషన్స్ అప్లయ్.!

‘కారు గుర్తు మీద గెలిచావ్ కదా.. రాజీనామా చెయ్.. అని తెలంగాణ రాష్ట్ర సమితి నేతలు నన్ను డిమాండ్ చేయొచ్చు. నేను రాజీనామా చెయ్యాలి కూడా.. చేస్తాను, ఖచ్చితంగా రాజీనామా చేస్తాను. కానీ, అంతకన్నా ముందు నన్ను ఇరవయ్యేళ్ళుగా ఆశీర్వదిస్తున్న హుజూరాబాద్ నియోజకవర్గ ప్రజల ముందుకు వెళ్ళాలి.. వారి అభిప్రాయాలు తెలుసుకోవాలి.. ఆ తర్వాతే ఏం చేయాలన్నదానిపై నిర్ణయం తీసుకుంటాను..’ అంటూ ఎమ్మెల్యే పదవికి రాజీనామాపై మాజీ మంత్రి ఈటెల రాజేందర్ వ్యాఖ్యానించారు.

తనపై ముఖ్యమంత్రి కేసీఆర్ రాజకీయంగా వేటు వేసిన దరిమిలా, ఈటెల రాజేందర్ మీడియా ముందుకొచ్చి తీవ్ర ఆవేదన వ్యక్తం చేశారు. కేసీఆర్, గతంలో ఎప్పుడూ డబ్బు కోసం రాజకీయాలు చేయలేదనీ, ఇప్పుడు పరిస్థితి మారిందని అన్నారు. కేసీఆర్ శిష్యరికంలో నేనెప్పుడూ డబ్బు కోసం రాజకీయాలు చేయాలనుకోలేదన్నారు. కేసీఆర్లో కారుణ్యం చూశాను తప్ప, కాఠిన్యం చూడలేదు, ఇప్పుడు చూస్తున్నాను.. అంటూ కంటతడిపెట్టినంత పనిచేశారు ఈటెల రాజేందర్.

రాజకీయంగా భవిష్యత్ కార్యాచరణపై ఇంకా నిర్ణయం తీసుకోలేదన్న ఈటెల రాజేందర్, రాజకీయాల్లోకి వచ్చింది ప్రజల కోసమేనని స్పష్టం చేశారు. పదవుల కోసం ఏనాడూ పాకులాడలేదన్న ఈటెల రాజేందర్, తన తండ్రి మధ్య తరగతి కుటుంబానికి చెందిన వ్యక్తి అనీ, తానిప్పుడు తిరిగి ఆ మధ్యతరగతి జీవితం సైతం గడపడానికి సిద్ధమేనని తేల్చి చెప్పారు. ‘న్యాయపోరాటం ఖచ్చితంగా చేస్తా..’ అంటూ ఈటెల రాజేందర్ చెప్పుకొచ్చారు.

‘ముఖ్యమంత్రి ఆదేశాల మేరకు అధికారులు రిపోర్ట్ ఇచ్చారు.. ఆ రిపోర్టులో అన్నీ తప్పుల తడకలే..’ అంటూ భూ కబ్జా వ్యవహారంపై ఈటెల సంచలన వ్యాఖ్యలు చేశారు. ఎమ్మెల్యేలు, మంత్రులెవరూ ఆత్మ సంతృప్తితో పనిచేసే పరిస్థితి తెలంగాణ రాష్ట్ర సమితిలో లేదనీ, ఆ విషయాన్ని తాను కుండబద్దలుగొట్టినందుకే ఈ పరిస్థితి వచ్చిందని ఈటెల చెప్పుకొచ్చారు. పదవులు లేకపోయినా, ప్రజల కోసం ధైర్యంగా పోరాడాలని నేర్పిన గురువు కేసీఆర్ అనీ, ఆ బాటలోనే తాను తన రాజకీయ భవిష్యత్తుపై ముందడుగు వేస్తానని ఈటెల వ్యాఖ్యానించడం చూస్తుటే, ఈటెల కొత్త రాజకీయ పార్టీ పెడతారన్న ఊహాగానాలకు బలం చేకూరుతోంది.