పోలవరంపై సీఎం జగన్ సమీక్ష: ‘తగ్గింపు’ నిజమేనా.? కాదా.?

పోలవరం ప్రాజెక్టు విషయంలో గత కొంతకాలంగా జరుగుతున్న రాద్ధాంతం అంతా ఇంతా కాదు. జాతీయ ప్రాజెక్టు అయిన పోలవరం ప్రాజెక్టుకి సంబంధించి కేంద్రం ఇవ్వాల్సిన నిధులపై స్పష్టత రావడంలేదు. ప్రస్తుతం దేశ ఆర్థిక వ్యవస్థ ఎదుర్కొంటున్న సవాళ్ళ నేపథ్యంలో పోలవరం ప్రాజెక్టుకి పూర్తిస్థాయిలో కేంద్రం నిథులు ఇవ్వగలుగుతుందా.? కేంద్రం నిధులు ఇవ్వకపోతే, రాష్ట్రం పోలవరం ప్రాజెక్టుని భరించగలదా.? అన్న ప్రశ్నలు తెరపైకి రావడం సహజమే.

అయితే, కేంద్రం మొదటి నుంచీ పోలవరం ప్రాజెక్టుకి సంబంధించి నిధుల విషయమై కొర్రీలు పెడుతూనే వుంది. పోలవరం ప్రాజెక్టు నీటి నిల్వ సామర్థ్యం విషయమై కేంద్రం రెండో ఆలోచన చేస్తోందనీ, రాష్ట్రం సైతం ఈ విషయంలో కేంద్రానికి మద్దతిచ్చేలా వుందనీ ప్రచారం జరుగుతోంది. వీటికి తోడు, పోలవరం ప్రాజెక్టు ఎత్తు తగ్గిస్తామని జగన్ తనకు చెప్పారంటూ గతంలో కేసీఆర్ ప్రకటించేసుకున్నారు. ఎత్తు తగ్గించడం ద్వారా నీటి నిల్వ సామర్థ్యం తగ్గుతుంది.. తద్వారా ముంపు ప్రాంతమూ తగ్గుతుంది. ఆ లెక్కన ఖర్చు చేయాల్సిన నిధులు కూడా తగ్గుతాయి. ఇన్ని అనుకూలతల నేపథ్యంలో కేంద్రం – రాష్టం ఓ అవగాహనకు వచ్చి, అసలు ప్రాజెక్టు లక్ష్యాన్ని నీరుగార్చుతున్నాయన్న విమర్శలు వినిపిస్తున్నాయి.

ఈ మధ్యనే నిల్వ సామర్థ్యం తగ్గింపు గురించి కేంద్రం కీలక నిర్ణయం తీసుకుందంటూ మీడియాలో వచ్చిన కథనాల నేపథ్యంలో ముఖ్యమంత్రి వైఎస్ జగన్, పోలవరం ప్రాజెక్టుపై తాజాగా సమీక్ష నిర్వహించారు. చిత్రమేంటంటే, ‘అసలు ఎత్తు తగ్గింపు అనే చర్చకు ఆస్కారమే లేదు. ఇదంతా దుష్ప్రచారం..’ అని అధికారులు ముఖ్యమంత్రి వైఎస్ జగన్‌కి తేల్చి చెప్పడం.

మీడియాలో ఓ వర్గం.. అంటే, టీడీపీ అనుకూల మీడియా జగన్ సర్కారుకీ, మోడీ సర్కారుకీ వ్యతిరేకంగా కథనాలు వండి వడ్డించడం అనేది సర్వసాధారణమైన విషయమే. కానీ, ప్రాజెక్టుపై జరుగుతున్న దుష్పచారం నేపథ్యంలో అటు కేంద్రం, ఇటు రాష్ట్రం.. ప్రజలకు భరోసా ఇవ్వాలి. జాతీయ ప్రాజెక్టు గనుక, ఆ జాతీయ ప్రాజెక్టుని కేంద్రం పర్యవేక్షిస్తున్నా.. రాష్ట్రమే నిర్మాణ పనులు చేస్తున్న దరిమిలా.. ఈ తరహా అనుమానాలకు ఆస్కారం లేకుండా చేయాల్సిన బాధ్యత అటు కేంద్రానిదీ, ఇటు రాష్ట్రానిదీ అవుతుంది.