అమరావతి భూ కుంభకోణం: చంద్రబాబుకి సీఐడీ నోటీసులు

మునిసిపల్ ఎన్నికల దెబ్బ నుంచి ఇంకా కోలుకోలేదు.. అంతలోనే టీడీపీ అధినేత చంద్రబాబుకి అనూహ్యమైన ఎదురు దెబ్బ తగిలింది. అమరావతి భూ కుంభకోణానికి సంబంధించి టీడీపీ అధినేతకు సీఐడీ నోటీసులు జారీ చేసినట్లు తెలుస్తోంది. ఈ మేరకు ప్రత్యేకంగా సీఐడీ బృందం హైదరాబాద్ వెళ్ళడం గమనార్హం. అయితే, ఏ అంశాలపై చంద్రబాబుకి సీఐడీ నోటీసులు ఇచ్చిందనేదానిపై ఇంకా స్పష్టత రావాల్సి వుంది.

చంద్రబాబు హయాంలో అమరావతిని ఆంధ్రపదేశ్ రాజధానిగా నిర్ణయించిన విషయం విదితమే. రైతుల నుంచి సుమారు 35 వేల ఎకరాల భూమిని చంద్రబాబు ప్రభుత్వం సమీకరించింది. ఈ క్రమంలో అనేక అవకతవకలు జరిగాయన్న ఆరోపణలున్నాయి. ముందస్తుగా రాజధానిని నిర్ణయించేసుకుని, తమ పార్టీకి చెందిన నేతల ద్వారా, బినామీల ద్వారా భూముల్ని కొనుగోలు చేసి, అక్కడ రేట్లు పెంచేసి.. ఆ తర్వాత అమరావతిని రాజధానిగా ప్రకటించారన్నది ప్రధానంగా చంద్రబాబుపై వైసీపీ చేస్తోన్న ఆరోపణ.

అధికారంలోకి వస్తూనే వైసీపీ, అమరావతి భూముల కుంభకోణంపై విచారణకు ఆదేశించిన విషయం విదితమే. ఈ కేసులో ఇప్పటికే పలు అరెస్టులు కూడా జరిగాయి. మరోపక్క, ముందస్తు అరెస్టులు వంటి వ్యవహారాలపై కొన్ని కేసుల్లో హైకోర్టు గ్యాగ్ ఆర్డర్ ఇవ్వడం వివాదాస్పదంగా మారింది. సుప్రీంకోర్టు ఆ గ్యాగ్ ఆర్డర్లను కొట్టిపారేసిన విషయం విదితమే. చంద్రబాబు, ఆయన హయాంలో మంత్రిగా పనిచేసిన నారాయణ సహా పలువురు టీడీపీ నేతలు అమరావతి కేంద్రంగా చేసుకుని పెద్దయెత్తున అక్రమాలకు పాల్పడ్డారనే ఆరోపణలున్నాయి.

అయితే, అమరావతికి సంబంధించి రైతులు ఇచ్చిన భూములు ఎక్కడికీ పోలేదనీ, అన్నీ పక్కాగానే చేశామనీ, అవినీతికి ఆస్కారమే లేదనీ టీడీపీ వాదిస్తూ వస్తోంది. మరి, ఈ కేసు ఎలాంటి మలుపులు తిరుగుతుందోగానీ, చంద్రబాబు సహా ఆయన కుమారుడు కూడా జైలుకెళ్ళడం ఖాయమని వైసీపీ చెబుతున్న దరిమిలా.. ఏం జరుగుతుందో వేచిచూడాల్సిందే.