‘ఛలో గుంటూరు’ రక్తసిక్తం.. మహిళా రైతులనీ చూడలేదు..

చలో గుంటూరు రక్తసిక్తమైంది. పోలీసుల ఆంక్షల్ని లెక్కచేయని అమరావతి రైతులు. తమ మనోబలమే తోడుగా ముందడుగు వేశారు. అమరావతినే రాజధానిగా కొనసాగించాలని ఉద్యమించారు. చలో గుంటూరు కార్యక్రమం చేపట్టిన అమరావతి రైతులను పోలీసులు అడ్డగించినా.. అరెస్టులు జరిగినా ఆగలేదు. ఎస్సీ రైతులపై అక్రమ కేసులు, వారి చేతులకు సంకెళ్లు వేయడాన్ని నిరసిస్తూ చేపట్టిన ఈ కార్యక్రమం తీవ్ర ఉద్రిక్తతల నడుమ విజయవంతమైంది.

నిరసనలో పాల్గొన్న మహిళలను పోలీసులు ఈడ్చేశారు. తల్లుల కోసం పిల్లలు ఏడుస్తున్నా ఖాకీల్లో కనికరం లేదు. మహిళా రైతుల దుస్తులు చిరిగిపోయాయి. వారి చేతులకు గాయాలయ్యాయి. అయినా.. వ్యాన్లలోకి ఎక్కించి పోలీసుస్టేషన్లకు తరలించారు. దీంతో అమరావతి నుంచి గుంటూరు వరకు నిర్బంధ వాతావరణమే నెలకొంది. ఈ కార్యక్రమం వల్ల శుక్రవారమే రాజధాని గ్రామాలన్నీ పోలీసుల ఆధీనంలోకి వెళ్లిపోయాయి. పలువురు నేతలను గృహనిర్బంధం చేసి కొందరిని అరెస్టు చేశారు. ‘చలో గుంటూరు జైలు’ కార్యక్రమానికి అనుమతి లేదని పలువురికి నోటీసులు ఇచ్చారు పోలీసులు. రాష్ట్రవ్యాప్తంగా పలువురు నేతలను హౌస్ అరెస్టులు చేశారు. రాజధాని గ్రామాల్లోని ముఖ్య నేతలకు నోటీసులు ఇచ్చారు. మహిళా రైతులను అరెస్టు చేశారు. వందల మంది రైతులను పోలీసుస్టేషన్లకు తరలించారు.

గుంటూరులో ఆంక్షలు..

చలో గుంటూరు సందర్భంగా నగరంలో పలుచోట్ల ఆంక్షలు విధించారు. జైలు పరిసరాల్లో భారీ ఎత్తున పోలీసులను మోహరించారు. వివిధ ప్రాంతాల నుంచి గుంటూరుకు చేరుకునే మార్గాల్లో 10 చెక్‌పోస్టులు ఏర్పాటు చేశారు. వాహనాలు తనిఖీలు చేశారు. గుంటూరు-అమరావతి మార్గంలో వెళ్లేవారి ఫొటోలు తీసారు. ఆధారాలుంటేనే అనుమతించారు.