పరకాల డాక్యుమెంటరీ: ఔను, రాజధాని విషాదమే.!

ఎక్కడన్నా రాజధాని అంటే, అదొక సంబరం. కానీ, రాజధాని అమరావతిని ‘విషాదం’గా మార్చేసే ప్రయత్నం జరుగుతోంది. ఔను, రాజధాని అమరావతి ఓ విషాదమే. ఎందుకంటే, ‘ఏకైక రాజధాని అమరావతి’ అంటూ నినదించిన ఎన్నో గొంతుకలు అలసి సొలసి తుది శ్వాస విడిచాయి. ‘మాది రైతుల ప్రభుత్వం..’ అని చెప్పుకుంటోన్న వైఎస్‌ జగన్‌ ప్రభుత్వం, అమరావతి రైతుల ఆవేదనను అర్థం చేసుకోలేకపోయింది.

ఎన్నికలకు ముందు ఒక మాట, ఎన్నికలయ్యాక ఓ మాట.! ఏరు దాటాక తెప్ప తగలేసిన చందాన, అమరావతిని ఎడారిగా, స్మశానంగా అభివర్ణించే స్థాయికి నిస్సిగ్గు రాజకీయాలు చేసింది అధికార వైఎస్సార్‌ కాంగ్రెస్‌ పార్టీ. ఇక, రాజధాని అమరావతికి సంబంధించి ‘రాజధాని విషాదం’ పేరుతో ప్రముఖ రాజకీయ విశ్లేషకుడు పరకాల ప్రభాకర్‌ ఓ డాక్యుమెంటరీని రూపొందించారు. గతంలో టీడీపీ ప్రభుత్వ హయాంలో ‘సలహాదారు’గా వ్యవహరించిన పరకాల ప్రభాకర్‌ ఈ డాక్యుమెంటరీని రూపొందించడం గమనార్హం.

ఇక, రాజధాని విషాద గాధ గురించి పరకాల ప్రభాకర్‌, తన డాక్యుమెంటరీలో ఆసక్తికరమైన విషయాల్నే ప్రస్తావించారు. రాజధాని అమరావతిపై చర్చ జరగాలనీ, అదే సమయంలో మూడు రాజధానుల అంశంపైనా చర్చ జరగాలని ఆకాంక్షించారు. అమరావతి కోసం భూములు ఇచ్చిన రైతాంగం గురించీ, ఈ క్రమంలో నడిచిన భూముల సమీకరణ అంశం గురించీ డాక్యుమెంటరీలో పేర్కొన్నారు. ఈ డాక్యుమెంటరీ పట్ల పలువురు ప్రముఖులు హర్షం వ్యక్తం చేస్తున్నారు.

తెలంగాణ రాష్ట్రానికి చెందిన పలువురు నాయకులు కూడా, ‘రాజధాని విషాదం’ డాక్యుమెంటరీ చూసి, కంటతడి పెడుతున్న వైనం కనిపిస్తోంది. రాజధాని అంటే అది ఆత్మగౌరవంతో సమానం. ఢిల్లీ మన భారతీయుల ఆత్మగౌరవం. హైద్రాబాద్‌ అంటే తెలంగాణ రాష్ట్ర ప్రజల ఆత్మగౌరవం. అలాగే అమరావతి కూడా ఆంధ్రప్రదేశ్‌ ప్రజల ఆత్మగౌరవం. దురదృష్టవశాత్తూ ఆ ఆత్మగౌరవం లాంటి అమరావతిని స్మశానమనీ, ఎడారి అనీ అభివర్ణిస్తున్నారు అధికార వైసీపీ నేతలు. పరకాల డాక్యుమెంటరీ రూపొందించారని కాదుగానీ, అమరావతి నిజంగానే ఓ విషాదం.

ప్రపంచంలో ఎక్కడా లేని విధంగా రాజధానిపై అధికార పార్టీ కుట్రలు చేయడం విషాదం కాక మరేమిటి.? ఎక్కడన్నా ఒకటి అద్భుతంగా కట్టి, ఆ తర్వాత ఇంకోదాని గురించి ఆలోచిస్తారు. కానీ, ఇక్కడ ఒకదాన్ని నాశనం చేసి (కూర్చున్న కొమ్మని నరికేసుకుని), ఇంకో రెండిటి గురించి ఆలోచిస్తున్నారు. ఇదీ వైపరీత్యమంటే.