రాజకీయాలు ఎప్పుడూ ఒకేలా వుండవ్.! ఎప్పటికప్పుడు మారిపోతుంటాయ్.! తెలంగాణ అసెంబ్లీ ఎన్నికలకు సంబంధించి ఈక్వేషన్స్ శరవేగంగా మారిపోతున్నాయి. ముందస్తు సర్వేల సంగతెలా వున్నా, ‘కోడ్’ అమల్లోకి వచ్చాక.. సమీకరణాలు మారుతున్న తీరు చూస్తోంటే, అధికార బీఆర్ఎస్ ఇబ్బందికరమైన పరిస్థితుల్నే ఎదుర్కోవాల్సి రావొచ్చు.
తెలంగాణలో జరిగిన అభివృద్ధి గురించి చెప్పుకోవాల్సిన గులాబీ పార్టీ, పొరుగు రాష్ట్రం గురించీ, ఆంధ్రోళ్ళ గురించీ చేస్తున్న వ్యాఖ్యలు ముమ్మాటికీ ఆ పార్టీలోని అంతర్గత కల్లోలానికి నిదర్శనంగానే చెప్పుకోవాలేమో.!
ఒకప్పటిలా గులాబీ పార్టీ, తెలంగాణ సెంటిమెంటుని రెచ్చగొట్టే పరిస్థితే లేదు. ఎందుకంటే, పార్టీలోంచే తెలంగాణ పేరుని పీకి పారేసుకున్నారు.! దాంతో, ‘ఇది తెలంగాణ పార్టీ’ అన్న ఇమేజ్‌ని గులాబీ పార్టీ కోల్పోయింది.
గ్రేటర్ హైద్రాబాద్ విషయానికొస్తే, ఆంధ్రప్రదేశ్‌లో చంద్రబాబు అరెస్టు, గ్రేటర్ పరిధిలో రాజకీయ సమీకరణాల్ని కాస్త ఆసక్తికరంగానే మార్చేసింది. టీడీపీ పోటీ చేయకపోవడం, బీజేపీ – జనసేన కలిసి పోటీ చేస్తుండడంతో ఇక్కడి రాజకీయాలు ఆసక్తికరంగా మారాయి.
రేవంత్ రెడ్డి గెలిస్తే, చంద్రబాబు షాడో సీఎం.. అనే ప్రచారం అధికార బీఆర్ఎస్ నుంచి గట్టిగా జరుగుతుండడం, ఆ బీఆర్ఎస్ పార్టీకే నష్టాన్ని కలిగిస్తోందని గ్రౌండ్ లెవల్‌లో జనం చర్చించుకుంటున్నారు.
ఏకబిగిన తొమ్మిదిన్నరేళ్ళ గులాబీ పార్టీ, తెలంగాణ రాష్ట్రాన్ని పరిపాలించింది. రెండు దఫాలు అధికారంలోకొచ్చిన గులాబీ పార్టీ, మూడో దఫా అధికారంలోకి వస్తామని అంటోందిగానీ, అదసలు అంత తేలికైన వ్యవహారమైతే కాదు. మరీ ముఖ్యంగా గ్రేటర్ దెబ్బకి గులాబీ పార్టీ ‘అబ్బా’ అనేలానే వుంది.!