Brahmanandam: ‘నవ్వడం ఒక భోగం.. నవ్వించడం ఒక యోగం.. నవ్వలేకపోవడం ఒక రోగం’ అన్నారు దర్శకుడు జంధ్యాల. సున్నితమైన హాస్యానికి కేరాఫ్ అడ్రెస్. అటువంటి జంధ్యాల ఓ వ్యక్తిలో హాస్యం, హావభావాలు గమనించి తెలుగు తెరపై రామబాణంలా వదిలితే గురి తప్పుతుందా..? తెలుగు ప్రజల మనసుల్లో ఆ బాణం బలంగా గుచ్చుకుని దాదాపు మూడున్నర దశాబ్దాలుగా అలుపెరగకుండా నవ్విస్తూనే ఉంది. ఆయన్ను చూస్తే పెదాలపై నవ్వు.. కళ్లలో వెలుగు.. మనసులో చక్కిలిగింతలు. ఆయనే ‘బ్రహ్మానందం’. పాత్రతో సంబంధం లేదు.. తెరపై ఆయన కనిపిస్తే చాలు నవ్వు గ్యారంటీ. మన జీవితాల్లో సినిమా ఒక భాగం అంటారు.. కానీ, బ్రహ్మానందం మన మనసుల్లో భాగం. ఎందుకంటే ఆయన మన నవ్వు.. మనశ్శాంతి. నేడు ఆ నవ్వుల రేడు పుట్టినరోజు.
సినిమాలో బ్రహ్మానందం ఎక్కడా..?
బ్రహ్మానందం లేని సినిమాలు ఎన్నో వచ్చాయి. కానీ.. ఈ ‘సినిమాలో బ్రహ్మానందం లేడే..’ అనే మాటలు కూడా వచ్చేవి. ఎందుకంటే.. ఎంతటి స్టార్ హీరో సినిమా అయినా బ్రహ్మానందం కోసం చూడటం ఓ అలవాటు. అంతగా ప్రేక్షకుల్ని నవ్వించారు. మాట.. హావభావాలతో నవ్వించడం ఆయన ప్రత్యేకత. సైలెన్స్ అనే మాట తప్ప సినిమా అంతా మాట్లాడకుండా ‘వినోదం’లో పంచిన వినోదం.. ఖాన్ తో గేమ్స్ ఆడకు, నెల్లూరు పెద్దారెడ్డి, భట్టు, జిలేబి, కిల్ బిల్ పాండే.. ఇలా ఎన్నెన్నో పాత్రలతో ఆయన నవ్వులు పంచారు. జంధ్యాల, ఎస్వీ కృష్ణారెడ్డి, ఈవీవీ సత్యనారాయణ.. ఓ తరహా కామెడీ రప్పిస్తే.. త్రివిక్రమ్, పూరి జగన్నాధ్, వినాయక్, శ్రీను వైట్ల మరో రేంజ్ లో ఆయన్నుంచి కావాల్సినంత హాస్యం రాబట్టారు. ఒక రకంగా దర్శక, రచయితలకే బ్రహ్మానందం సవాల్ విసిరారని చెప్పాలి.
సోషల్ మీడియా కింగ్..
ప్రస్తుత సోషల్ మీడియా యుగంలో బ్రహ్మానందం తన హవా చూపిస్తున్నారు. ప్రతి సెల్ ఫోన్లో ఆయనే. ఆయన ఫొటో, క్లిప్, మీమ్ తో తెల్లారాల్సిందే.. నవ్వాల్సిందే.. రోజు గడవాల్సిందే. ‘మీమ్ గాడ్’ బ్రహ్మానందం అనే పేరు సోషల్ మీడియాలో మోగిపోతోందంటే సినిమాలు తగ్గించుకున్నా ఆయన హవా ఏంటో తెలుస్తుంది. తెలుగు సినిమాపై రేలంగి, రాజబాబు తర్వాత అంతటి రేంజ్ సంపాదించింది ఒక్క బ్రహ్మానందమే. నా నుంచి ప్రజలకు ఇంతటి నవ్వులు పంచుతున్న మీకు ధన్యవాదాలు.. అని మీమర్స్ ను ఉద్దేశించి అన్నారు బ్రహ్మానందం. ఆయన కామెడీ ఎప్పుడూ బోర్ కొట్టవు మరి. బ్రహ్మానందం మరిన్ని కామెడీ పాత్రలతో అలరించాలని.. మరిన్ని పుట్టినరోజులు జరుపుకోవాలని మనసారా ఆకాంక్షిస్తూ పుట్టినరోజు శుభాకాంక్షలు చెప్తోంది ‘తెలుగు బులెటిన్’.