బిగ్‌ షాక్‌: శ్రీముఖి నోటికి తాళమేసిన వరుణ్‌ సందేశ్‌

బిగ్‌బాస్‌ రియాల్టీ షోలో ఆసక్తికరమైన పరిణామం చోటు చేసుకుంది. కింద పడ్డా పై చేయి తనదేనని గుడ్డిగా వాదించే శ్రీముఖి నోటికి తాళమేసేయగలిగాడు వరుణ్‌ సందేశ్‌. అయితే, దురదృష్టవశాత్తూ వరుణ్‌ సందేశ్‌ వాదన నెగ్గలేదు. వివరాల్లోకి వెళితే, ఓ ఫన్‌ టాస్క్‌ని బిగ్‌బాస్‌, కంటెస్టెంట్స్‌ ముందుంచాడు. కన్ఫెషన్‌ రూమ్‌లోకి కంటెస్టెంట్స్‌ని రప్పించడం, వారితో రకరకాల పనులు చేయించడం.. ఈ టాస్క్‌లో ప్రధాన ఘట్టం. బిగ్‌బాస్‌ ఏం చెబితే అది కన్ఫెషన్‌ రూమ్‌ నుంచి బయటకు వచ్చాక కంటెస్టెంట్స్‌ చెప్పాలి. అది తప్పో, ఒప్పో మిగతా కంటెస్టెంట్స్‌ జడ్జ్‌ చేయాల్సి వుంటుంది. కరెక్ట్‌గా జడ్జ్‌ చేస్తే డిన్నర్‌ని బిగ్‌బాస్‌ గిఫ్ట్‌గా ఇస్తాడు. అదీ కథ.

రాహుల్‌ సిప్లిగంజ్‌తో కన్ఫెషన్‌ రూమ్‌లో సిట్‌ అప్స్‌ చేయించిన బిగ్‌బాస్‌, ఇంటి నుంచి ఫోన్‌ వచ్చిందనీ, పెళ్ళి కుదిరిందనీ చెప్పమన్నాడు. అదే చెప్పాడు రాహుల్‌ కంటెస్టెంట్స్‌కి. అది అబద్ధమని మెజార్టీ సభ్యులు తేల్చారు. కానీ, అది నిజమేనని ముగ్గురు చెప్పారు. అంతే, ‘బొక్క పడింది..’ అంటూ శ్రీముఖి అసహనం వ్యక్తం చేసింది.. తన నిర్ణయానికి ఎక్కువ మంది మద్దతు పలకకపోవడంతో. శ్రీముఖి నొచ్చుకోవడంతో వితిక, శివజ్యోతి తదితరులు.. తమ నిర్ణయాన్ని మార్చుకున్నారు. అది వరుణ్‌కి ఒళ్ళు మండేలా చేసింది. ‘బొక్క పడిందని చెప్పడమేంటి.? కంటెస్టెంట్స్‌ని ప్రభావితం చేసేలా ఓవరాక్షన్‌ చేయడమేంటి.?’ అంటూ వరుణ్‌ నిలదీశాడు.

ఈ క్రమంలో మాటా మాటా పెరిగింది. ‘ఎందుకు అరుస్తావ్‌.?’ అని వరుణ్‌ నిలదీశాడు. ‘నా వాయిస్‌ ఇంతే..’ అని శ్రీముఖి బదులు ఇచ్చింది. ‘నువ్వు అరిస్తే.. నువ్వు బూతులు మాట్లాడితే అది నీ ఇష్టమా.. అదే రాహుల్‌ నోరు జారితే అది నేరమా.?’ అని వరుణ్‌ ప్రశ్నించేసరికి శ్రీముఖి మరింత రెచ్చిపోయింది.. ఆ తర్వాత గొడవ ఎలాగోలా సద్దుమణిగింది. ఈ ఎపిసోడ్‌ తర్వాత, శ్రీముఖి, కన్ఫెషన్‌ రూమ్‌లోకి వెళితే, నాగార్జున ఫొటోతో మాట్లాడాలని బిగ్‌బాస్‌ ఆదేశించాడు. ఈ క్రమంలో శ్రీముఖి, తన గొంతు తగ్గే మార్గం చూపించాలంటూ నాగార్జున ఫొటోకి విజ్ఞప్తి చేసింది.

సో, వరుణ్‌ సందేశ్‌ ఎట్టకేలకు శ్రీముఖి నోటికి తాళం వేయగలిగినట్లే. మరోపక్క, మహేష్‌ విట్టా తాను ఎలిమినేట్‌ అయినట్లు కన్ఫెషన్‌ రూమ్‌ నుంచి బయటకొచ్చి చెప్పాడు. కానీ, ఎవరూ అది నమ్మలేదు. ‘నేను ఎలిమినేట్‌ అయిపోతే నన్ను చూసి ఏడ్చేవాడు ఒక్కరూ లేరు..’ అని అన్నాడు మహేష్‌. అయితే ఆ తర్వాత అదంతా ఉత్తదేనని బిగ్‌బాస్‌ ప్రకటించడం జరిగిపోయింది. ఈ వారం మొత్తానికి కాస్తో కూస్తో ఫర్వాలేదన్పించిన ఎపిసోడ్‌ ఈ రోజు మాత్రమే జరిగిందని నిస్సందేహంగా చెప్పొచ్చు. రేపే ఎలిమినేషన్‌. ఎవరి వికెట్‌ పడుతుందో మరికొద్ది గంటల్లోనే ఓ క్లారిటీ వచ్చేయబోతోంది.