జస్ట్ ఆస్కింగ్: భూమా.. ఇంత దిగజారుడుతనమా.?

భూమా కుటుంబం అంటే, కర్నూలు జిల్లాలో చాలా గౌరవ ప్రతిష్టలు, పేరు ప్రఖ్యాతులు వున్న కుటుంబం. కానీ, అదంతా గతం. ఇప్పుడు భూమా.. అనగానే, కబ్జాలు.. హత్యలు.. కిడ్నాప్‌లు గుర్తుకొస్తున్నాయ్. భూమా నాగిరెడ్డి.. ఆయన సతీమణి శోభా నాగిరెడ్డి.. రాజకీయాలకు వన్నె తెచ్చారు. కుటుంబ గౌరవ ప్రతిష్టలు కాపాడాల్సిన భూమా అఖిల ప్రియ.. మొదటి నుంచి వివాదాల్లోనే నానుతున్నారు.

ఒకప్పడు ఆమె పట్ల సానుభూతి వుండేది.. కానీ, ఇప్పుడు పరిస్థితి దారుణంగా తయారయ్యింది. కిడ్నాప్ కేసులో మాజీ మంత్రి భూమా అఖిల ప్రియను తెలంగాణ పోలీసులు అరెస్ట్ చేయడమేంటి.? ఈ కేసులో ఆమె భర్త పరారీలో వుండటమేంటి.? అసలు మాజీ మంత్రి భూమా అఖిలప్రియ అరెస్ట్ అవడమంటే.. అంత సాహసం తెలంగాణ పోలీసులైనా ఎలా చేయగలిగారు.? ఇక్కడ సాహసం.. అనే మాట ఎందుకు అనాల్సి వచ్చిందంటే.. కేసు అంత బలంగా లేకపోతే, ఆమెను అరెస్ట్ చేయడం సాధ్యమయ్యే పని కాదు.

పైగా, తెలంగాణలోని అధికార టీఆర్ఎస్‌లోనూ భూమా అభిమానులు కొందరున్నారు. తెలంగాణ ముఖ్యమంత్రి కేసీఆర్ బంధువులుగా చెప్పబడుతున్న ప్రదీప్ రావు మరికొందర్ని భూమా అఖిలప్రియ భర్త భరత్ రామ్ రెడ్డి కిడ్నాప్ చేయించాడన్నది ప్రధాన ఆరోపణ. ప్రదీప్ రావు అలాగే భూమా అఖిలప్రియ.. ఆమె భర్త భరత్ మధ్య కొంత కాలంగా భూ వివాదం నడుస్తోంది. అదే ఈ కిడ్నాప్ వ్యవహారానికి కారణంగా తెలుస్తోంది.

కర్నూలు జిల్లాలో కొన్నాళ్ళ క్రితం సొంత పార్టీకి చెందిన నేతనే హత్య చేయించేందుకు భూమా అఖిలప్రియ ప్రయత్నించారనే ఆరోపణలు ఇప్పటికీ వినిపిస్తున్నాయి. ఆ కేసు అలా వుండగానే, ఇప్పుడు భూమా అఖిలప్రియ ఇంకోసారి వివాదాల్లోకి ఎక్కారు.

ఎలాంటి కుటుంబం పరువు ఎంతలా దిగజారిపోతోంది.? అంటూ భూమా అభిమానులు వాపోతున్నారంటే.. ఆ స్థాయికి భూమా అఖిల ప్రియ తన కుటుంబ గౌరవాన్ని దిగజార్చేశారని నిస్సందేహంగా చెప్పొచ్చు. కానీ, ఎందుకిలా.? ఇదంతా రాజకీయ కుట్ర మాత్రమే.. అని అఖిలప్రియ చెప్పదలచుకుంటే అంతకన్నా హాస్యాస్పదం ఇంకోటుండదు.