బాలకృష్ణ ‘తిట్టు’ వెనుక రాజకీయ కోణం.!

నందమూరి బాలకృష్ణకి ‘నోటి దురద’ కాస్త ఎక్కువే. ఆఫ్‌ స్క్రీన్‌, ఆన్‌ స్క్రీన్‌.. అవలీలగా ఆయన నోట బూతులు వచ్చేస్తాయి. ఈ మధ్యనే తెలుగు సినీ పరిశ్రమలో చోటు చేసుకుంటున్న కొన్ని పరిణామాలపై అసహనం వ్యక్తం చేస్తూ బాలయ్య నోరు పారేసుకున్న విషయం విదితమే. రాయడానికి వీల్లేని ఓ తిట్టు బాలయ్య నోట బయటకు వచ్చేస్తే, దాన్ని బీప్‌ చేసి పారేశారు. సినిమాల్లో ‘బురద జాతి’ అంటూ డైలాగులు పేల్చడం బాలయ్యకు కొత్త కాదు.

తాజాగా బాలయ్య కొత్త సినిమా నుంచి మరో తిట్టు బయటకొచ్చింది. ఇది కూడా రాయడానికి వీల్లేని పదమే. బాలయ్య అభిమానులు మాత్రం, ‘మాస్‌.. ఊర మాస్‌..’ అంటున్నారు. కానీ, ఆంధ్రప్రదేశ్‌కి చెందిన ఓ ప్రముఖ పొలిటీషియన్‌కి మాత్రం ఆ తిట్టు తీవ్ర ఆగ్రహం తెప్పిస్తోంది. ఆయనెవరో అందరికీ తెల్సిందే. నోటి దురదకు కేరాఫ్‌ అడ్రస్‌ ఆయన. పైగా, ఇప్పుడు ఓ కీలక పదవిలో వున్నారు. అన్నిటికీ మించి ఆయన బాలయ్యబాబుకి వీరాభిమాని కూడా. కానీ, ప్రత్యర్థి పార్టీలో వున్నాడిప్పుడు. ‘నీ యమ్మ మొగుడు..’ అంటూ అవలీలగా బూతులు మాట్లాడేయగల ఆ ప్రముఖ పొలిటీషియన్‌ని ఉద్దేశించి, బాలయ్య తన కొత్త సినిమాలో డైలాగు రాయించుకున్నాడనే ప్రచారం జరుగుతోంది.

ఈ తరహా డైలాగులు తెరపై చూపించడంలో దర్శకుడు బోయపాటి దిట్ట. బాలయ్యకే కాదు, టీడీపీ అధినేత నారా చంద్రబాబునాయుడికి కూడా బోయపాటి శ్రీను అత్యంత సన్నిహితుడు. ఆ కారణంగానే, చంద్రబాబుని బూతులు తిట్టిన సదరు ప్రముఖ పొలిటీషియన్‌ మీద బోయపాటి, తన సినిమాలో బాలయ్య ద్వారా ఈ డైలాగు వేయించాడనే చర్చ అటు సినీ వర్గాల్లోనూ, ఇటు రాజకీయ వర్గాల్లోనూ జరుగుతోంది.

సోషల్‌ మీడియాలో అయితే సదరు పొలిటీషియన్‌ గతంలో వాడిన ‘నీ యమ్మ మొగుడు’ డైలాగ్‌నీ, దానికి కౌంటర్‌గా బాలయ్య సినిమా డైలాగ్‌నీ పేర్కొంటూ మీమ్స్ హల్‌చల్‌ చేసేస్తున్నాయి. నిజమేనా.. ఇదంతా రాజకీయ కోణంలో జరుగుతున్నదేనా.? అదే నిజమైతే, సినిమాలో ఇంకెన్ని ‘అద్భుతమైన బూతులు’ వుంటాయో.! మాస్‌.. ఊర మాస్‌ డైలాగుల సంగతి సరే.. రాజకీయ రచ్చ షురూ అయితే.? సినిమా రిలీజుకి రాజకీయంగా ఇబ్బందులు ఎదురైతే.? ఏమో, కాలమే సమాధానం చెప్పాల్సిన ప్రశ్నలివి.