బాలకృష్ణ, బోయపాటిని పట్టుకొనేదెవరు?

బాలకృష్ణ, బోయపాటి శ్రీను కాంబినేషన్ లో రూపొందబోయే సినిమాపై అందరి దృష్టి సాగుతోంది. బాలకృష్ణ ఇష్టపడి, కష్టపడి నటించిన ‘యన్టీఆర్ బయోపిక్’ ఢమాల్ మన్నా, ఆయన మళ్ళీ హిందూపురం అసెంబ్లీ నియోజకర్గం నుండి శాసనసభ్యునిగా గెలుపొందడంతో అభిమానుల్లో నూతనేత్తజం కలిగింది. ఈ నేపథ్యంలోనే బాలయ్యతో బోయపాటి శ్రీను రూపొందించబోయే మూడవ చిత్రానికి క్రేజ్ పెరిగింది. ఇంతకు ముందు ఈ చిత్రాన్ని బాలయ్య స్వయంగా నిర్మించాలని బావించారు. కొంత మొత్తాన్ని బోయపాటికి అడ్వాన్స్ గా కూడా ఇచ్చారు. అయితే తాను తొలిసారి నిర్మాతగా నిర్మించిన యన్టీఆర్ బయోపిక్ రెండు భాగాలు పరాజయం పాలు కావడంతో సెంటిమెంట్ గా ఫీలయ్యాడట బాలయ్య. ఈ నేపథ్యంలోనే బాలయ్య, బోయపాటి మూడో సినిమాను చేజిక్కించుకోవడానికి కొందరు నిర్మాతలు ఆసక్తి చూపిస్తున్నట్టు సమాచారం.

బాలకృష్ణ, బోయపాటి మూడో సినిమాను దిల్ రాజు చేపట్టే అవకాశం ఉందని వినిపించింది. నిజానికి బాలయ్య కాంపౌండ్ తో దిల్ రాజుకు అంత సన్నిహిత సంబంధాలేవీ లేవు. కానీ, ఒకప్పుడు దిల్ రాజు- బాలయ్యతో సినిమా తీయాలని ట్రయిల్స్ వేసిన మాట వాస్తవం. అందువల్ల ఇప్పుడు కూడా దిల్ రాజు ఈ క్రేజీ కాంబినేషన్ ను సొంతం చేసుకొనే యోచనలో ఉన్నాడు. నిజానికి దిల్ రాజు కాంపౌండ్ నుండే ‘భద్ర’ సినిమాతో దర్శకునిగా పరిచయమయ్యాడు బోయపాటి శ్రీను. కానీ, ఆ తరువాత బోయపాటి, దిల్ రాజు మధ్య కొన్ని కారణాల వల్ల దూరం పెరిగింది. మళ్ళీ బోయపాటి, దిల్ రాజు బ్యానర్ లో పనిచేయలేదు. ఎందుకంటే దిల్ రాజు ప్రతీ విషయంలో జోక్యం చేసుకుంటూ ఉంటాడని, దర్శకునికి అంతగా స్వేచ్ఛనివ్వడని బోయపాటి భావిస్తున్నట్టు తెలుస్తోంది.

ఈ మధ్యకాలంలో “అజ్ఞాతవాసి, అరవింద సమేత” వంటి స్టార్ మూవీస్ నిర్మించిన రాధాకృష్ణ (చినబాబు) సైతం బాలయ్య, బోయపాటి కాంబినేషన్ పై కన్నేసినట్టు వినికిడి. ఈ బ్యానర్ అయితే బాగుంటుందని బోయపాటి భావిస్తున్నాడట. ఎందుకంటే చినబాబు దర్శకునికి పూర్తి స్వేచ్ఛనిస్తారని అతని నమ్మకం. అందువల్ల బాలయ్యతో తాను తీసే మూడో సినిమాను చినబాబు నిర్మాణంలో నిర్మించాలనే బోయపాటి యోచిస్తున్నట్టు తెలుస్తోంది. మరి బాలయ్య, బోయపాటి క్రేజీ కాంబోను ఈ సారి సొంతం చేసుకొనే నిర్మాత ఎవరవుతారో?