లౌకిక దేశంలో హిందూత్వం గెలిచింది.. మోదీ చేసింది తప్పు! ఓవైసీ వ్యాఖ్యలు

ప్రధానిగా ప్రమాణస్వీకారంలో ప్రజసామ్యానికి, లౌకికి విలువలను పాటిస్తానన్న మోదీ మాట తప్పారని హైదరాబాద్ ఎంపీ, ఎంఐఎం అధినేత అసదుద్దీన్ ఓవైసీ వ్యాఖ్యానించారు. అయోధ్యలో ఈరోజు జరిగిన రామమందిర నిర్మాణం శంకుస్థాపనలో మోదీ పాల్గొనడాన్ని ఆయన తప్పు బట్టారు. లౌకిక దేశంలో ఆయన ఈ కార్యక్రమంలో ఎలా పాల్గంటారని ఓవైసీ ప్రశ్నించారు. లౌకికవాద దేశంలో ప్రధాని హోదాలో మోదీ హాజరుకావడం తప్పేనని అన్నారు. నేడు అయోధ్యలో రామమందిరం శంకుస్థాపనకు ప్రధాని మోదీ హాజరయ్యారు. ఈ సందర్భంగా అసదుద్దీన్ ఓవైసీ మాట్లాడుతూ మోదీ తీరుపై మండిపడ్డారు.

శంకుస్థాపన కార్యక్రమం పూర్తైన తర్వాత మోదీ ప్రసంగంపై కూడా ఆయన మండిపడ్డారు. ‘రామమందిరం నిర్మాణానికి పునాదిరాయి పడడంతో భావోద్వేగానికి గురయ్యాను’ అన్న ప్రధాని వ్యాఖ్యలను ఓవైసీ తప్పుబట్టారు. భారతదేశ పౌరుడిగా తాను కూడా అదే స్థాయి భావోద్వేగానికి లోనయ్యాను. ‘ఎందుకంటే 450 ఏళ్ల నుంచీ అక్కడ మసీదు ఉంది కాబట్టి’ అని అన్నారు. ఇంకా ఆయన మాట్లాడుతూ.. ‘ఈరోజు భారతదేశంలో ప్రజాస్వామ్యం, లౌకికవాదం ఓడిపోయింది. కేవలం హిందుత్వం మాత్రమే గెలిచింది అని అన్నారు.