అంబులెన్సుల కోసమేమో అలా.. అరెస్టుల కోసమేమో ఇలా.!

వైఎస్సార్ కాంగ్రెస్ పార్టీ రెబల్ ఎంపీ రఘురామకృష్ణ రాజుని నిన్న ఏపీ సీఐడీ అరెస్ట్ చేసిన విషయం విదితమే. విద్వేషపూరిత వ్యాఖ్యలతో సమాజంలో అలజడికి కారణమవుతున్నారనీ, ప్రభుత్వంపై అసత్య ప్రచారాలతో నిందారోపణలు చేస్తున్నారనీ ఆయన మీద అభియోగాలు మోపబడ్డాయి. సరే, రాజకీయాల్లో ఇలాంటివన్నీ మామూలే. సొంత పార్టీ ఎంపీని వైసీపీ ప్రభుత్వం అరెస్ట్ చేసుకుంది. ఇందులో వింతేమీ లేదు. పార్టీ లైన్ దాటారు గనుక, సమయం కోసం వేచి చూసి దెబ్బకొట్టారు. బెయిల్ వస్తుందా.? ఈ కేసు ఎలాంటి మలుపులు తిరుగుతుంది.?

కుప్పలు తెప్పలుగా కేసులు నమోదు చేసిన దరిమిలా, ఒకదానిలో బెయిల్ వస్తే, ఇంకో దానిలో బుక్ చేసి వేధించడం.. ఇవన్నీ ఇటు మీడియా, అటు రాజకీయ వర్గాల్లో జరుగుతున్న చర్చల సారాంశాలు. అవన్నీ పక్కన పెడదాం. తెలంగాణకి ఆంధ్రపదేశ్ నుంచి అంబులెన్సులు వెల్లడం కష్టంగా మారింది.. తెలంగాణ ప్రభుత్వ తీరు కారణంగా. ఈ గందరగోళం వల్ల రెండు ప్రాణాలు పోయినట్లు వైసీపీ అధికారిక మీడియా సంస్థ చెబుతోందాయె. పరిస్థితి తీవ్రతను చెప్పడానికి ఇంతకన్నా నిదర్శనం ఇంకేం కావాలి.? ఇంతటి ప్రత్యేక పరిస్థితుల్లో, పుట్టినరోజునాడు ఎంపీ రఘురామకృష్ణరాజుని అరెస్ట్ చేయాల్సిన అవసరం ఏమొచ్చింది.? అని సోషల్ మీడియా వేదికగా నెటిజన్లు ప్రశ్నిస్తున్నారు. ప్రాణాపాయంలో వున్న తమ పౌరుల్ని మెరుగైన వైద్య చికిత్స కోసం తెలంగాణకు పంపడం కంటే కూడా, ఆంధ్రపదేశ్ ప్రభుత్వానికి, ఓ ఎంపీ (సొంత పార్టీకి చెందిన రెబల్ ఎంపీ) అరెస్టు అత్యంత ప్రాముఖ్యమైన అంశం కావడం చాలామందికి విస్మయాన్ని కలిగించింది.

‘చట్టం తన పని తాను చేసుకుపోతుంది’ అని వైసీపీ నేతలు.. అందునా కొందరు మంత్రులు చెబుతున్నారు. చట్టం ఎవరి కోసం పనిచేస్తోందో గత కొన్నేళ్ళుగా మారిన రాజకీయాల్ని చూస్తున్న సామాన్యులకు అర్థమవుతూనే వుంది. రాష్ట్రంలో కొత్త వైరస్.. అంటూ చంద్రబాబు చేసిన వ్యాఖ్యలపై ఆయనపై కేసు నమోదవుతుంది.. అవే వ్యాఖ్యలు ఓ మంత్రి చేస్తే, అటు వైపుగా పోలీసులు కనీసం కన్నెత్తి కూడా చూడరన్నది విపక్షాల విమర్శ.