పీకల్లోతు అప్పుల్లో ఏపీ

విభజన నాటి నుంచే తీవ్రమైన ఆర్థిక ఇబ్బందులతో సతమతమవుతున్న ఏపీ మరింత అప్పుల్లోకి కూరుకుపోతోంది. ఆశించినంత ఆదాయం లేకపోవడం, సంక్షేమ పథకాలకు భారీగా వెచ్చించడం వంటి పరిణామాలు ఏపీ ఆర్థిక వ్యవస్థను కుదేలు చేస్తున్నాయి. కేంద్రం నుంచి కూడా సరైన సహకారం లేకపోవడంతో ప్రస్తుత పరిస్థితి మరీ దారుణంగా తయారైంది. రాష్ట్రంలో అభివృద్ధి పనులకు బిల్లులు చెల్లించే పరిస్థితి లేకపోగా.. నెల నెలా ఉద్యోగుల జీతభత్యాలు, పింఛన్లు తదితరాల చెల్లింపులకు ఆర్థికశాఖ అష్ట కష్టాలు పడుతోంది.

కొత్తగా సచివాలయ ఉద్యోగాల్లో చేరినవారికి ఇంకా వేతనాలు అందని పరిస్థితి ఉంది. దేశంలో ఆర్థిక మాంద్యం నెలకొనడం, రాష్ట్రంలోని పరిస్థితులతో ఆదాయం లేకపోవడంతో ఖజానా కటకటలాడుతోంది. అయినప్పటికీ ఎన్నికల్లో ఇచ్చిన హామీల మేరకు సీఎం వైఎస్ జగన్ మోహన్ రెడ్డి ఎప్పటికప్పుడు సంక్షేమ పథకాలను ప్రారంభిస్తూ వస్తున్నారు. కానీ ఇవన్నీ డబ్బుతో ముడిపడి ఉన్నవే కాబట్టి అప్పు తేక తప్పని పరిస్థితి నెలకొంది.

దీంతో సర్కారు ఎడాపెడా అప్పులు చేసేస్తోంది. ఎంతవరకు అవకాశం ఉంటే అంత మేర రుణాలు చేస్తోంది. ఈ ఆర్థిక సంవత్సరం ఇంకా నాలుగు నెలల సమయం ఉండగానే ఇప్పటికే దాదాపు రూ.34వేల కోట్ల మేర అప్పు తెచ్చింది. ఇందులో ఒక్క నవంబర్ లోనే రూ.8500 కోట్లు రుణం తీసుకుంది. ఈ ఆర్థిక సంవత్సరంలో ఇంకా నాలుగు నెలలు ఉండగా.. ప్రతినెలా అప్పు తేకుంటే ముందుకు వెళ్లలేని పరిస్థితులున్నాయి.

ఈ నేపథ్యంలో ప్రతినెలా దాదాపు రూ.8వేల కోట్లు తెచ్చినా మరో రూ.30 వేల కోట్లకు పైగా అప్పు చేయాల్సిందే. పైగా జనవరి నుంచి అమ్మఒడి పథకం ప్రారంభం కానున్న నేపథ్యంలో మరింత మొత్తం అవసరం ఉంది. అయితే, సర్కారుకు ఇక రూ.7వేల కోట్ల మించి రుణ పరిమితి లేదు. అంటే కిందా మీదా పడినా రూ.7వేల కోట్లు మాత్రమే అప్పు పుడుతుందన్నమాట. ఆ మొత్తంతో డిసెంబర్ నెట్టుకొచ్చినా.. మిగిలిన మూడు నెలల పరిస్థితి ఏమిటన్నది అయోమయంగా మారింది. ఈ పరిస్థితిని సీఎం జగన్ ఎలా అధిగమిస్తారో చూడాలి.