పెళ్ళికి కనీస వయసు సరే, శృంగారానికో మరి.!

పెళ్ళికి ముందు శృంగారం నేరం కాదట.. కానీ, పెళ్ళికి కనీస వయసు అవసరమట. ఇదెక్కడి వింత.? అజిన జనం ముక్కున వేలేసుకోవచ్చుగాక. అదంతే, అదే భారతదేశమంటే. రూల్స్ వుంటాయ్.. కానీ, వాటిని పాటించేదెవరు.? కొత్తగా, దేశంలో మహిళల వివాహ వయస్సుని 21 ఏళ్ళకు సవరించనుంది కేంద్రం. ఈ మేరకు చట్టంలో మార్పులు చేయనుంది.

ఇప్పటిదాకా మహిళలకు వివాహానికి సంబంధించి కనీస వయసు 18 ఏళ్ళుగా వుంది. దాన్ని 21 ఏళ్ళకు పెంచారు. నిజానికి, మంచి ఆలోచనే ఇది. ఇందులో ఇంకో మాటకు తావు లేదు. శారీరకంగా, మానసికంగా స్త్రీలు ఎన్నో సమస్యలు ఎదుర్కొంటున్నారు, చిన్న వయసులోనే పెళ్ళిళ్ళు అవడంతో. వివిధ రకాల అనారోగ్య సమస్యలు, చిన్నతనంలో పెళ్ళయిన మహిళల్ని వేధిస్తున్నాయి.

ఈ నేపథ్యంలోనే, సుదీర్ఘంగా ఈ అంశంపై సమాలోచనలు జరిపి, కీలక నిర్ణయాన్ని కేంద్రం తీసుకుంది. అయితే, ఇక్కడే ఇంకో ప్రశ్న పుట్టుకొస్తోంది. పెళ్ళికి ముందు శృంగారం తప్పు కాదంటున్నారు.. పెళ్ళికేమో కనీస వయసు నిర్ణయిస్తున్నారు. మరి, అసలు ‘సమస్య’కు పరిష్కారమెలా లభిస్తుంది.?

స్కూలు వయసు దాటకుండానే, బాలికలు గర్భం దాల్చుతున్న ఘటనలు దేశంలో తరచూ చూస్తూనే వున్నాం. ఆయా ఘటనల్లో కేసులు నమోదవుతున్నాయి.. నిందితులకు శిక్షలూ పడుతున్నాయి. కానీ, ఈ తరహా ఘటనల సంఖ్య పెరుగుతోంది తప్ప తగ్గడంలేదు.

అసలు, దేశంలో వివాహ వ్యవస్థకు గుర్తింపు క్రమక్రమంగా తగ్గిపోతూ వస్తోంది. ప్రస్తుతం అంతా సహజీవనాల ట్రెండ్ నడుస్తోంది. ‘సహజీవనం చేస్తే తప్పేంటి.?’ అని నేటి యువతరం ప్రశ్నిస్తుండడాన్ని చూస్తున్నాం. సెలబ్రిటీలకు ‘మీరు ఎవరితో డేటింగ్‌కి వెళ్ళడానికి ఇష్టపడతారు..’ అంటూ మీడియా, నిస్సిగ్గుగా అడుగుతున్న రోజులివి.
మొత్తమ్మీద, మహిళల వివాహానికి సంబంధించి కనీస వయసులో మార్పు.. చాలా రకాల ప్రశ్నలపై చర్చ జరిగేలా చేస్తోంది.