నిన్నటి వరకు జేజేలు.. ఇకపై ధూమ్ ధామ్ లు..

రావాలి జగన్ … కావాలి జగన్… ఈ పాట ఆంధ్రప్రదేశ్ లో ఎంతగా ఫేమస్ అయ్యిందో చెప్పక్కర్లదు. ఈ సాంగ్ తో పాటుగా జగన్ రాష్ట్రవ్యాప్తంగా మూడేళ్లపాటు ఓదార్పు యాత్ర, పాదయాత్ర పేరుతో పర్యటించారు. ఇలా పర్యటనలు చేయడంతో… జగన్ ఎన్నికల్లో 151 సీట్లు గెలుచుకొని తన ముఖ్యమంత్రిగా ప్రమాణస్వీకారం చేసిన సంగతి తెలిసిందే.

జగన్ అధికారంలోకి వచ్చిన తరువాత వరసగా సంక్షేమ పధకాలు ప్రవేశపెడుతూ మంచి సీఎం అనిపించుకోవాలని పాపం తెగ తాపత్రయపడ్డారు. సరే పోనీలే అంతగా తాపత్రయపడుతున్నారు కదా అని ప్రజలు కూడా మంచి సీఎం అని పొగడటం మొదలుపెట్టాడు. ఇలా ప్రతి ఒక్కరు పొగడటం వలన అనుకుంటా పాపం పొగరు తలకెక్కింది. ఇది సహజమే.

తాము ఏం చేసినా ప్రజలు అంగీకరిస్తారు అనే మాట మనసులో పడిపోయింది అంటే చేసే పనులు కూడా అలానే ఉంటాయి. అందుకు ఓ ఉదాహరణ కేంద్రంలోని బీజేపీ. కేంద్రంలో బీజేపీ తీసుకునే నిర్ణయాలను ఇప్పుడు ప్రజలు ఎలా వ్యతిరేకిస్తున్నారో చూస్తూనే ఉన్నాం.

ఇదే విధంగా ఇప్పుడు ఆంధ్రప్రదేశ్ రాష్ట్రంలో జగన్ ప్రభుత్వం కూడా అవలంబిస్తోంది. ఉన్న రాజధానిని అలా ఉండనివ్వకుండా… తేనెతుట్టెను కదిపినట్టుగా కదిపింది. అసలే రైతులు రాజదాని కోసం భూములు ఇచ్చి ఉన్నారు. ఆ భూములకు సంబంధించిన అభివృద్ధి ఒక్క ఇంచేకూడా జరగలేదు.

రైతులకు బాబు వెన్నుపోటు పొడిచాడు అనుకుంటే.. జగన్ ఉన్న రాజధానిని అమరావతి నుంచి విశాఖకు మారుస్తున్నట్టు ప్రకటించి ముందు నుంచి పోటు పొడిచాడు. రైతుల ప్రభుత్వం అని చెప్తూనే రైతుకు పోటు పొడవడంతో పాపం దిక్కుతోచక రోడ్డుపై పడ్డారు. భూములు ఇచ్చిన ఒక్క టీడీపీ రైతులే కాదు. అటు వైకాపా రైతులు కూడా భూములు ఇచ్చారు. తమ ఆర్ధిక పరిస్థితిపై దెబ్బకొడితే ఎవరైనా ఎలా చూస్తూ ఊరుకుంటారు.

ముందు తాము బాగుంటేనే పార్టీ గురించి ఆలోచిస్తారు. తమకు వ్యతిరేకంగా నిర్ణయాలు తీసుకుంటే అధికారంలో ఎవరంటే ఏంటి… అని రోడ్డుపైకి వస్తారు. జేజేలు పలికిన నోటితోనే వ్యతిరేకంగా నినాదాలు చేస్తున్నారు. మరి ఈ రైతులను ప్రభుత్వం ఎలా శాంతింపజేస్తుందో చూడాలి.