వివేకా హత్యలో నా ప్రమేయముంటే ఎన్ కౌంటర్ చేయండి

మాజీ ఎంపీ వైఎస్ వివేకానందరెడ్డి హత్యలో తన ప్రమేయం ఉంటే బహిరంగంగా ఉరి తీయాలని లేదా దిశ నిందితులను ఎన్ కౌంటర్ చేసినట్టే తనను కూడా ఎన్ కౌంటర్ చేసుకోవచ్చని మాజీ మంత్రి ఆదినారాయణరెడ్డి స్పష్టంచేశారు. వివేకా హత్య కేసులో ప్రత్యేక దర్యాప్తు బృందం (సిట్) విచారణకు ఆయన హాజరయ్యారు. దాదాపు గంటన్నరపాటు అధికారులు ఆయన్ను విచారించారు.

అనంతరం ఆదినారాయణరెడ్డి విలేకరులతో మాట్లాడుతూ.. వివేకాను చంపింది ఎవరో అందరికీ తెలుసంటూ వ్యాఖ్యానించారు. ‘‘మీ అందరి మనస్సాక్షికీ తెలుసు. పులివెందుల ప్రజలకు తెలుసు.. వివేకాను ఎవరు చంపారో? ఈ కేసులో విచారణ కోసం నన్ను పిలిచారు. వారు అడిగిన ప్రశ్నలన్నింటికీ సమాధానం చెప్పాను’’ అని వెల్లడించారు.

వివేకా హత్యకు తనకు ఎలాంటి సంబంధం లేదన్నారు. హత్య జరిగిన రోజున తాను విజయవాడలో ఉన్నానని తెలిపారు. వివేకా హత్య జరిగిన తర్వాత ఈ కేసును సీబీఐకి అప్పగించాలంటూ జగన్ హైకోర్టులో రిట్ దాఖలు చేశారని, కానీ ఆయన అధికారంలోకి వచ్చిన తర్వాత సిట్ ఎందుకు వేశారని ప్రశ్నించారు.

ఇప్పుడు అన్ని పార్టీలూ సీబీఐ దర్యాప్తునకు ఆదేశించాలని డిమాండ్ చేస్తున్నాయని పేర్కొన్నారు. ఈ హత్యలో తన ప్రమేయం ఉందని తేలితే తనను బహిరంగంగా ఉరి తీయాలన్నారు. లేకుంటే దిశ నిందితులను ఎన్ కౌంటర్ చేసినట్టుగా తనను కూడా ఎన్ కౌంటర్ చేసుకోవచ్చన్నారు. ఈ కేసులో నిజానిజాలు బయటకు రావాలంటే సీబీఐకి అప్పగించాలని డిమాండ్ చేశారు.