జనసేన అమ్ములపొదిలో మరో ‘అస్త్రం’

రాజకీయ రంగంలో సరికొత్త మార్పు కోసం సినీ నటుడు పవన్‌ కళ్యాణ్‌ జనసేన పార్టీని స్థాపించి జనంలోకి వెళ్ళిన విషయం విదితమే. 2014లో ప్రారంభమైన జనసేన పార్టీ, ఇటీవలి ఎన్నికల్లో ఆశించిన రీతిలో ఫలితాలు సాధించలేకపోయినా, డబ్బుతో సంబంధం లేకుండా రాజకీయాలు చేయవచ్చునని నిరూపించింది. మార్పు కోసం పాతికేళ్ళ పోరాటం.. అనే అద్భుతమైన ఎజెండా పెట్టుకున్న జనసేన పార్టీ, రానున్న రోజుల్లో పార్టీ పని తీరు ఎలా వుండాలన్నదానిపై పార్టీ ముఖ్య నేతలతో సమీక్ష నిర్వహించింది.

పవన్‌కళ్యాణ్‌ నేతృత్వంలో పార్టీ ముఖ్య నేతలంతా ఈ సమావేశానికి హాజరయ్యారు. ఈ క్రమంలో పార్టీ కోసం ఓ పత్రిక ఖచ్చితంగా వుండాలనే అభిప్రాయం వ్యక్తమయ్యింది. వాస్తవానికి ఈ ఆలోచన గత కొన్నేళ్ళుగా జనసేనలో విన్పిస్తూనే వుంది. జనసేన తరఫున పక్ష పత్రిక ప్రారంభించనున్నట్లు తాజాగా జనసేన అధినేత పవన్‌ కళ్యాణ్‌ వెల్లడించారు. ఈ మేరకు పార్టీ ముఖ్య నేత హరిప్రసాద్‌ ఓ ప్రకటన విడుదల చేశారు. ప్రజా సమస్యల్ని వెలుగులోకి తీసుకురావడం, ప్రస్తుత రాజకీయాలపై మేధావులు, రాజకీయ విశ్లేషకుల అభిప్రాయాలు, దేశ విదేశాలకు సంబంధించిన పాలసీ నిర్ణయాలు, సంక్షేమం – అభివృద్ధికి సంబంధించిన అంశాలు ఈ పత్రికలో ప్రచురితమవుతాయి. సెప్టెంబర్‌లో తొలి పత్రిక రాబోతోంది. ప్రింట్‌ వెర్షన్‌ అలాగే, ఈ-వెర్షన్‌ పత్రిక కూడా అందుబాటులో వుంటుంది.

మరోపక్క, ఇటీవలి ఎన్నికలు – ఫలితాల గురించి పార్టీలో విస్తృతమైన చర్చ జరుగుతోంది. ఈ రోజు పలు జిల్లాలకు చెందిన నేతలు, కార్యకర్తలు, అభ్యర్థులతో స్వయంగా జనసేన అధినేత పవన్‌కళ్యాణ్‌ మాట్లాడారు. ఈ సమావేశంలో పవన్‌ కళ్యాణ్‌ సోదరుడు, నర్సాపురం లోక్‌సభ నియోజకవర్గం నుంచి పోటీ చేసిన జనసేన అభ్యర్థి నాగబాబు కూడా పాల్గొన్నారు. ఇదిలా వుంటే, పార్టీ కోసం అహర్నిశలు పనిచేస్తోన్న కార్యకర్తలు, ముఖ్యంగా మెగా ఫ్యాన్స్‌ విషయంలో నాగబాబు ఇకపై ప్రత్యేక శ్రద్ధ పెట్టనున్నట్లు తెలుస్తోంది. అభిమానుల్ని పార్టీ కార్యకర్తలుగా, జనసైనికులుగా మలచే బాధ్యతను నాగబాబుపై పవన్‌కళ్యాణ్‌ వుంచారని సమాచారమ్‌. వీలు చిక్కినప్పుడల్లా రాష్ట్రమంతటా పర్యటించి, అభిమానులతో నాగబాబు ప్రత్యేకంగా సమావేశాలు నిర్వహిస్తారట. అదే విధంగా తెలంగాణలోనూ పార్టీ విస్తరణపై అంతర్గతంగా పార్టీలో చర్చ జరుగుతోంది.