న్యాయమూర్తి రామకృష్ణకు బెయిల్

రాజద్రోహం కేసులో అరెస్టు అయి సస్పెండ్ అయిన న్యాయమూర్తి రామృష్ణకు ఏపీ హైకోర్టులో ఊరట లభించింది. ఉన్నత న్యాయస్థానం ఆయనకు రూ.50వేల పూచీకత్తుతో బెయిల్ మంజూరు చేసింది. కేసు విషయంలో విచారణాధికారికి సహకరించాలని ఆదేశించింది. అదే సమయంలో కేసుపై మీడియాతో మాట్లాడొద్దని స్పష్టంచేసింది. రాజ్యాంగబద్ధంగా ఏర్పాటైన ఏపీ ప్రభుత్వం, సీఎం జగన్ పై ప్రజల్లో ద్వేషం కలిగించేందుకు ప్రయత్నిస్తున్నారన్న ఆరోపణలపై జడ్జి రామకృష్ణను ఈ ఏడాది ఏప్రిల్ లో అరెస్టు చేశారు. చిత్తూరు జిల్లా పీలేరుకు చెందిన జయరామచంద్రయ్య ఫిర్యాదు మేరకు ఆయనపై ఐపీసీ సెక్షన్ 124ఏ కింద రాజద్రోహం కేసు నమోదు చేశారు. అనంతరం పీలేరు సబ్ జైలుకు తరలించారు. తర్వాత దీనిపై ఆయన బెయిల్ కోసం ఏపీ హైకోర్టును ఆశ్రయించగా.. విచారణ జరిపిన న్యాయస్థానం షరతులతో కూడిన బెయిల్ మంజూరు చేసింది.