ఎగ్జిక్యూటివ్ క్యాపిటల్ ముసుగులో ఈ అమ్మకాలేంటి జగన్ సారూ.!

‘విశాఖపట్నం ఎగ్జిక్యూటివ్ క్యాపిటల్ కాబోతోంది.. ఏ క్షణాన అయినా, విశాఖకు పరిపాలనా రాజధాని తరలి వస్తుంది..’ అంటూ ఇటీవల మంత్రి బొత్స సత్యనారాయణ వ్యాఖ్యానించారు. ప్రభుత్వం నుంచి ఈ విషయమై స్పష్టమైన సంకేతాలు వెలువడుతున్నాయి. విశాఖ అభివృద్ధికి కట్టుబడి వున్నామనీ, ప్రపంచ స్థాయి నగరంగా విశాఖను అభివృద్ధి చేస్తామనీ వైఎస్ జగన్ సర్కార్ చెబుతోంది. విశాఖ ఎగ్జిక్యూటివ్ క్యాపిటల్ అవుతుందో లేదోగానీ, విలువైన భూములు మాత్రం ప్రైవేటు వ్యక్తుల పరం కాబోతున్నాయి విశాఖలో. అభివృద్ధి అంటే, రాష్ట్రంలో భూముల్ని అమ్మేయడం మాత్రమేనన్న చర్చ చాలా రోజులుగా జరుగుతోంది.

కోర్టు మొట్టికాయలు పడుతున్నాసరే, ఖజానా నింపుకోవడం కోసం రాష్ట్రానికి ఇంకో మార్గం కనిపించడంలేదు. దాదాపు 1500 కోట్ల రూపాయల విలువైన భూమిని అమ్మేయాలన్నది జగన్ సర్కార్ తాజా సంకల్పం. ఈ మేరకు ప్రకటనలు కూడా వచ్చేశాయి. రేపో మాపో ఆ భూముల్ని కొనేందుకు ‘గద్దలు’ వాలిపోవడం కూడా ఖాయమే. ఆ గద్దలు కూడా పొలిటికల్ గద్దలు, అందునా బులుగు గద్దలే అవుతాయి.. ఇందులో ఇంకో మాటకు తావే లేదు. మామూలుగా అయితే, ప్రభుత్వ భూముల ఆక్రమణ జరుగుతుంటుంది.. అది వివాదాస్పదమవుతుటుంది. ఇది కూడా ఓ టైపు ఆక్రమణ లాంటిదే.. అధికారిక ఆక్రమణ అన్నమాట. ‘ఎవడబ్బ సొమ్మనీ..’ అని అడిగే నాథుడు లేడు గనుక, విలువైన భూముల్ని ప్రభుత్వం అమ్మకానికి పెట్టేస్తోందన్నమాట.

1500 కోట్లు వస్తాయి సరే.. విశాఖను ఆ 1500 కోట్లతో అభివృద్ధి చేయాలన్న ప్రణాళికలు ఏమన్నా వున్నాయా? ఆ ఒక్కటీ అడక్కూడదు. ఎగ్జిక్యూటివ్ క్యాపిటల్ పేరుతో కాకపోయినా, కనీసం విశాఖ కోసం.. ఓ హైటెక్ సిటీ లాంటి భవనమో.. ఇంకో నిర్మాణమో గత రెండేళ్ళలో జగన్ సర్కార్ చేపట్టగలిగిందా.? లేదు, కానీ.. విశాఖపట్నంపై వైసీపీకి బోల్డంత మమకారం. ఎందుకు వుండదు.. విశాఖలో విలువైన భూములున్నాయ్ మరి.