హైదరాబాద్ లో 50 లక్షల విలువైన ఫోన్లు చోరీ

టెక్నాలజీ ఎంత పెరిగినా నేరాలూ, దోపిడీలు, దొంగతనాలు జరుగుతునే ఉన్నాయి. ఎవరెన్ని జాగ్రత్తలు తీసుకున్నా దోపిడీలూ ఆగడం లేదు. ఈమధ్యే ఏపీలోని చిత్తూరు జిల్లాలో సెల్ ఫోన్ల లోడుతో వెళ్తున్న కంటైనర్ ను దుండగులు చేజ్ చేసి మరీ కోట్ల విలువైన సరుకును ఎత్తుకెళ్లిపోయారు. ఇప్పుడు హైదరాబాద్ లో మరో సెల్ ఫోన్ల దొంగతనం జరిగింది. లక్షల విలువైన సెల్ ఫోన్లను దొంగతనం చేశారు. కాకపోతే.. ఈసారి ఓ షోరూమ్ లో దొంగతనానికి పాల్పడ్డారు. పోలీసులు తెలిపిన వివరాల ప్రకారం..

హైదరాబాద్ శివారులోని మదీనాగూడలో ఉన్న రిలయన్స్ డిజిటల్ షోరూమ్ లో శనివారం ఉదయం భారీ దొంగతనం జరిగింది. సుమారు 50 లక్షల విలువైన సెల్ ఫోన్లు చోరీకి గురైనట్టు తెలుస్తోంది. దీపావళి సందర్భంగా ఈరోజు ఉదయమే షాపు తెరిచారు సిబ్బంది. లోపలికి వెళ్లిన సిబ్బందికి సెల్ ఫోన్లు చెల్లాచెదురుగా పడి ఉండటం గమనించారు. దొంగతనం జరిగినట్టు గుర్తించి వెంటనే సమాచారాన్ని పోలీసులకు అందించారు. ఘటనా స్ధలానిక చేరుకున్న పోలీసులు విచారణ ప్రారంభించారు.

షోరూమ్ లో మిగిలిన ఏఏ వస్తువులు చోరీకి గురయ్యాయో పరిశీలించారు. ఈ సందర్బంగా నిందితులను గాలించేందుకు అయిదు ప్రత్యేక బృందాలను ఏర్పాటు చేశారు. పండగ రోజునే చోరీ జరగడం స్థానికంగా చర్చనీయాంశమైంది.