తెలంగాణలో కమ్యూనిటీ వ్యాప్తి ప్రారంభమైంది..జాగ్రత్తగా వుండాలి!: హెల్త్ డైరెక్టర్

దేశంతో పాటు తెలంగాణ రాష్ట్రంలో కూడా ప్రతిరోజూ కరోనా కేసులు పెరుగుతున్నాయి. ఈ నేపథ్యంలో తెలంగాణ రాష్ట్ర వైద్య ఆరోగ్య శాఖ సంచలన ప్రకటన చేసింది. రాబోయే నాలుగైదు వారాలు అత్యంత జాగ్రత్తగా ఉండాలని హెచ్చిరించింది. రాష్ట్రంలోని ద్వితీయ శ్రేణి నగరాల్లో కరోనా వ్యాప్తి పెరిగే అవకాశం ఉందని తెలిపింది. ఈ మేరకు హెల్త్ డైరక్టర్ శ్రీనివాసరావు పరిస్థితుల గురించి వివరించారు.

గతంలో ఎన్నడూ లేనంత పరిస్థితి ఉండొచ్చని హెచ్చరించారు. దీనిని కరోనా కమ్యూనిటీ వ్యాప్తి దశగా ఆయన చెప్పుకొచ్చారు. దీనిపై వైద్యులు, సిబ్బంది కూడా ఒత్తిడికి లోనవుతున్నారని చెప్పుకొచ్చారు. కరోనా లక్షణాలు ఉన్నవారు మాత్రమే టెస్టులు చేయించుకోవాలని.. పాజటిటివ్ వచ్చిన వారు వెంటనే వైద్యం చేయించుకోవాలని సూచించారు.

దీంతో రాష్ట్రంలో కరోనా 3వ స్టేజ్ కు చేరుకుందని ఆయన చెప్పారు. జిల్లల్లోని పీహెచ్ సీల్లో కూడా కరోనా టెస్టులు చేస్తున్నామన్నారు. కరోనా లక్షణాలున్న వారు ఆలస్యం చేస్తే ప్రాణాలకే ప్రమాదం అన్నారు. పాజిటివ్ కేసులు పెరుగుతున్నా రికవరీ కేసులు కూడా పెరుగుతున్నాయన్నారు. కరోనా లక్షణాలున్న వారు త్వరగా చికిత్స తీసుకుంటే ప్రాణాపాయం ఉండతని తక్కువ మందులతోనే బయటపడొచ్చని తెలిపారు.

ప్రభుత్వాసుపత్రుల్లో 8399 పడకలు ఉన్నాయని.. ప్రైవేటు ఆసుపత్రులకు వెళ్లి ఆర్ధికంగా నష్టపోవద్దని సూచించారు. రాష్ట్రంలో ప్రతిరోజూ 15వేల టెస్టులు జరుగుతున్నాయని అన్నారు. హోమ్ ఐసొలేషన్ లోనే 70శాతం మంది రోగులు ఉంటున్నారని అన్నారు. కరోనా నియంత్రణకు ప్రభుత్వం రూ.100 కోట్లు కేటాయించింద‌ని తెలిపారు. ఇతర రాష్ట్రాలతో పోలస్తే తెలంగాణలో పరిస్థితులు బాగానే ఉన్నాయన్నారు.