అమరావతిపై ‘ఢిల్లీ’ లీకుల్లో నిజమెంత.?

ఆంధ్రప్రదేశ్‌ రాజధాని అమరావతి విషయంలో కేంద్రం ‘జోక్యం’ షురూ అయ్యిందట. కేంద్రం, రాష్ట్రంలో తాజా పరిణామాలపై దృష్టి సారించిందనీ, రాజధాని మార్పు విషయమై ఆంధ్రప్రదేశ్‌ ప్రభుత్వం దూకుడుకు కళ్ళం వేయాలనే ఆలోచనతో వుందనీ ‘లీకులు’ అందుతున్నాయి. అదేంటో, ఈ లీకులన్నీ ఆంధ్రప్రదేశ్‌లో టీడీపీ అనుకూల మీడియాకే అందుతుంటాయి. ప్రస్తుతం అభివృద్ధి వికేంద్రీకరణ బిల్లు, సీఆర్డీయే రద్దు బిల్లులు గవర్నర్‌ విశ్వభూషణ్‌ హరిచందన్‌ పరిశీలనలో వున్నాయి.

వైఎస్‌ జగన్‌ ప్రభుత్వం ఆ బిల్లుల్ని కొద్ది రోజుల క్రితం గవర్నర్‌ వద్దకు పంపగా, గవర్నర్‌ న్యాయ సలహా కోరారనీ, న్యాయసలహా అనంతరం ఆ బిల్లులు తిరిగి గవర్నర్‌ వద్దకు చేరాయనీ ప్రచారం జరుగుతోంది. ఏ క్షణాన అయినా గవర్నర్‌ ఈ బిల్లులపై నిర్ణయం తీసుకోనున్నారనే వార్తలు విన్పిస్తున్న వేళ, కేంద్రం ఈ వ్యవహారంలో జోక్యం చేసుకుంటోందనీ, తాజా పరిస్థితులపై నివేదికల్ని కూడా సంబంధిత వర్గాల నుంచి కేంద్రం కోరిందనీ టీడీపీ అనుకూల మీడియాలో కథనాలు గుప్పుమంటున్నాయి. ఇందులో నిజమెంత.?

నిజానికి, అమరావతి విషయంలో బీజేపీ ద్వంద్వ వైఖరితో కన్పిస్తోంది. అమరావతికి ప్రధాని నరేంద్ర మోడీ శంకుస్థాపన చేసినా, రాజధాని నిర్మాణానికి కేంద్రం ఇవ్వాల్సిన స్థాయిలో నిధులు ఇవ్వలేదన్నది నిర్వివాదాంశం. అప్పట్లో టీడీపీ – బీజేపీ మిత్రపక్షాలుగా వున్నాయి కూడా. అయితే, ఆ తర్వాత పరిణామాలు మారాయి. అమరావతిపై బీజేపీ నేతలు చాలా అవినీతి ఆరోపణలు చేశారు. ఇందులో ‘కుల పరమైన’ ఆరోపణలు కూడా వచ్చాయి. కానీ, రాజధాని అమరావతిలోనే వుండాలనే గత ప్రభుత్వ నిర్ణయానికి కట్టుబడి వున్నామంటూ బీజేపీ నేతలు చెబుతూ వస్తున్నారు.

అమరావతి కోసం జరిగిన, జరుగుతున్న ఉద్యమాల్లో బీజేపీ పాల్గొంటూనే వుంది. కానీ, రాజధాని విషయంలో నిర్ణయం రాష్ట్ర ప్రభుత్వానిదేననీ.. ఇందులో కేంద్రం జోక్యం వుండదని జీవీఎల్‌ నరసింహారావు లాంటి కొందరు బీజేపీ నేతలు చెబుతున్నారు. మరి, కేంద్రం.. అమరావతి విషయంలో జోక్యం చేసుకుంటోందన్న ప్రచారం నిజమేనా.? రాష్ట్ర ప్రభుత్వం ప్రతిపాదించిన మూడు రాజధానులకు కేంద్రం మోకాలడ్డుతుందా.? వేచి చూడాల్సిందే.