వారందరికీ ప్రాంతీయ బోర్డుల్లో పునరావాసం

చాలామందికి రాజకీయ పునరావాస కేంద్రంగా మారిన శాసనమండలిని రద్దు చేసే దిశగా ఏపీలోని వైఎస్ జగన్ సర్కారు ముందుకెళుతోంది. సోమవారం వరకు వేచిచూసి, ఆలోగా పరిణామాలు తమకు అనుకూలంగా మారకపోతే.. మండలిని రద్దు చేస్తూ అసెంబ్లీలో తీర్మానం ఆమోదించే అవకాశాలు కనిపిస్తున్నాయి. ఇదే జరిగితే అటు టీడీపీతోపాటు అధికార పార్టీకి కూడా నష్టమే జరగనుంది.

ప్రస్తుతం మండలిలో అధికార పార్టీకి 9 మంది సభ్యులున్నారు. మండలి రద్దైతే వారందరి పదవులు కూడా పోతాయి. పైగా రాబోయే నాలుగేళ్లలో 15 నుంచి 20 మందిని ఎమ్మెల్సీలుగా నియమించే అవకాశం వైసీపీకి వస్తుంది. ఎన్నికల్లో టికెట్లు ఇవ్వనివారికి ఎమ్మెల్సీలుగా అవకాశమిస్తానని జగన్ పలువురికి హామీ ఇచ్చారు. మండలి లేకుంటే ఈ హామీ అమలు కాదు. అయినప్పటికీ, జగన్ మండలి రద్దుకే మొగ్గు చూపుతున్నట్టు వైసీపీ వర్గాల నుంచి తెలిసింది.

రాష్ట్ర సమగ్రాభివృద్ధికి మూడు ప్రాంతీయ అభివృద్ది బోర్డులను ఏర్పాటు చేస్తూ సర్కారు ఇటీవల నిర్ణయం తీసుకుంది. దీనికి సంబంధించిన బిల్లును ఇటీవలే శాసనసభ ఆమోదించింది. సీఎం జగన్ చైర్మన్ గా వ్యవహరించే బోర్డులో వైస్ చైర్మన్ తోపాటు తొమ్మిది మంది సభ్యులను నియమించే అవకాశం ఉంది. వైస్ చైర్మన్ కి కేబినెట్ హోదా కూడా ఇవ్చొచ్చు.

ఈ నేపథ్యంలో ఎమ్మెల్సీలుగా అవకాశం కోల్పోయినవారిని ఆయా బోర్డుల్లో నియమిస్తారని చెబుతున్నారు. ఒక్కో బోర్డులో ఒక ఎంపీ, ఇద్దరు ఎమ్మెల్యేలు సభ్యులుగా వ్యవహరిస్తారు. మిగిలిన సభ్యులను ప్రభుత్వం నియమిస్తుంది. ఇలా మండలి బదులు ప్రాంతీయ బోర్డుల్లో వారికి పదవులు ఇచ్చే అవకాశం ఉంది. ఈ నేపథ్యంలోనే మండలి రద్దుకు సైతం వెనకాడకుండా ముందుకెళ్లాలని జగన్ యోచిస్తున్నట్టు సమాచారం.

సాధ్యమైనంత వరకు టీడీపీ ఎమ్మెల్సీలను తమకు అనుకూలంగా మలుచుకోవడానికి అధికార పార్టీ ప్రయత్నిస్తుందని, అది కుదరని పక్షంలోనే మండలి రద్దుకు ముందుకెళ్లే అవకాశం ఉందని, ఈ నేపథ్యంలోనే వ్యూహాత్మకంగా మూడు రోజులు సమయం ఉండేలా సోమవారం సభలో దీనిపై చర్చించాలని సర్కారు నిర్ణయం తీసుకుందని పేర్కొంటున్నారు.