40 ఇయర్స్‌ ఇండస్ట్రీ.. ఈ చంద్రబాబుకి ఏమయ్యింది.?

నలభయ్యేళ్ళ సుదీర్ఘ రాజకీయ జీవితం తన సొంతమని తెలుగుదేశం పార్టీ అధినేత నారా చంద్రబాబునాయుడు చెబుతుంటారు. దేశంలోనే సీనియర్‌ మోస్ట్‌ పొలిటీషియన్స్‌లో తానూ ఒకడినని పదే పదే తన గురించి తానే చంద్రబాబు డబ్బా కొట్టుకోవడం చూస్తూనే వున్నాం. పరిస్థితులు అనుకూలించడంలేదో.. ఆయన తీరే అంతటిదోగానీ.. చంద్రబాబుకి పండగలనగానే ఒళ్ళు మండిపోతోంది.

ఉమ్మడి ఆంధ్రప్రదేశ్‌ రెండుగా విడిపోయాక, 13 జిల్లాల ఆంధ్రప్రదేశ్‌ తీవ్రంగా నష్టపోయిందని చెబుతూ ఆంధ్రప్రదేశ్‌ అవతరణ దినోత్సవ వేడుకలు జరపకుండా, విడిపోయిన రోజు.. అదే జూన్‌ 2న నిరసన కార్యక్రమాలకు పిలుపునిచ్చేవారు చంద్రబాబు. ఇప్పుడు అమరావతి రగడ పేరుతో సంక్రాంతి పండక్కి నానా యాగీ చేశారీ సీనియర్‌ పొలిటీషియన్‌.

ఎవరు ఔనన్నా ఎవరు కాదన్నా, 3 రాజధానుల విషయమై రాష్ట్రంలో కొన్ని జిల్లాల్లో కొంత సంతోషకర వాతావరణం నెలకొన్న మాట వాస్తవం. రాయలసీమలో అయితే దాదాపుగా మూడు రాజధానులకు సపోర్ట్‌ లభిస్తోంది. ఉత్తరాంధ్ర సంగతి సరే సరి. కృష్ణా – గుంటూరు జిల్లాల్లో కేవలం అమరావతి ప్రాంతంలోనే ఆందోళన ఎక్కువగా వుంది. అది మినహాయిస్తే.. మిగతా రాష్ట్రమంతా మూడు రాజధానులకు మద్దతిస్తోందని అనలేంగానీ.. అమరావతి ఆందోళనని పట్టించుకోవడంలేదని మాత్రం నిస్సందేహంగా చెప్పొచ్చు.

ఈ పరిస్థితుల్లో, కేవలం 29 గ్రామాల సమస్యని నెత్తికెత్తుకుని.. చంద్రబాబు ఏకంగా సంక్రాంతి పండగని జరుపుకోవద్దని పిలుపునివ్వడమేంటి.? నిజానికి ఇది కేవలం 29 గ్రామాల సమస్య కాదు. కానీ, అలాగే ప్రొజెక్ట్‌ అవుతోంది. రాష్ట్రమంతా చంద్రబాబు జోలెపట్టుకు తిరుగుతున్నా.. అమరావతికి మద్దతుగా ఇతర జిల్లాలకు చెందిన ప్రజలు ఉద్యమించడంలేదన్నది నిర్వివాదాంశం.

అయినా, పండగలు ఆపేసుకుంటే.. రాజధాని అమరావతి విషయంలో ప్రభుత్వం తలొగ్గుతుందా.? ఇదెక్కడి ఆలోచన.? అమరావతి ప్రజలకు సంఘీబావం తెలపాలనడం వరకూ బాగానే వుంది. కానీ, ఇదేం పైత్యం. ఇలాంటి అర్థం పర్ధం లేని వాదనలతో చంద్రబాబు తన స్థాయిని తగ్గించుకోవడమే కాదు.. ఆయా ఉద్యమాల్నీ నీరుగార్చేస్తున్నారు.