అబ్జర్వేషన్‌: ‘డెమో’ డిజాస్టర్‌కి మూడేళ్ళు!

డెమో డిజాస్టర్‌కి మూడేళ్ళంటూ సోషల్‌ మీడియాలో ఓ హ్యాష్‌ ట్యాగ్‌ ట్రెండింగ్‌లో వుంది. ‘డెమో’ అంటే డెమోనిటైజేషన్‌.. అదే పెద్ద నోట్ల రద్దు. అప్పటిదాకా చెలామణీలో వున్న 500 రూపాయల నోటుతోపాటు వెయ్యి రూపాయల నోటుని 2016 నవంబర్‌ 8వ తేదీన అప్పటి ప్రధాని నరేంద్ర మోడీ రద్దు చేస్తూ అనూహ్య ప్రకటన చేయడందో దేశమంతా ఉలిక్కి పడింది.

కొన్ని రోజులపాటు ఏటీఎంలు పనిచేయలేదు.. కొన్ని నెలలపాటు ప్రజలకు నగదు లభ్యత లేకుండా పోయింది. ఈ క్రమంలో కొన్ని ప్రాణాలు పోయాయి కూడా. బ్యాంకుల్లో దాచుకున్న తమ డబ్బుని తీసుకునేందుకు ప్రజలు పడ్డ పాట్లు అన్నీ ఇన్నీ కావు. ’50 రోజులు ఓపిక పట్టండి..’ అంటూ ప్రదాని ఇచ్చిన పిలుపుకి దేశ ప్రజానీకం సానుకూలంగానే స్పందించింది. కష్టాలు పడినా, నరేంద్ర మోడీని నమ్మింది. అయితే, దురదృష్టవశాత్తూ ప్రధాని నరేంద్ర మోడీ ఇచ్చిన మాటను నిలబెట్టుకోలేకపోయారు.

కొందరు రాజకీయ ప్రత్యర్థులపై ఆయన ప్రభుత్వం కక్ష సాధింపు చర్యలు చేపట్టడం మినహా.. దేశానికి పెద్ద నోట్ల రద్దు వల్ల జరిగిన ప్రయోజనమేమీ లేదు. ఎన్నికల్లో డబ్బు ప్రభావం తగ్గుతుందనీ, తీవ్రవాదం అంతమైపోతుందనీ, దేశం నుంచి అవినీతి, నల్లధనం మటుమాయమైపోతాయనీ ప్రధాని నరేంద్ర మోడీ చెప్పిన విషయం విదితమే. అవేమీ జరగలేదు. పైగా, దేశం ఆర్థిక సంక్షోభంలో కూరుకుపోయింది.

ఎన్నికల్లో వెయ్యి నోటు పంచడం కంటే 2000 నోటు పంచడం తేలికవడంతో, రాజకీయ పార్టీలు దాన్నొక సువర్ణావకాశంగా మార్చుకున్నాయి.. రాజకీయాలు మరింత కలుషితమైపోయాయి. అయితే, అన్నీ నష్టాలే కాదు.. కొన్ని లాభాలూ జరిగాయి. కొంత మొత్తంలో ఫేక్‌ కరెన్సీ కాలగర్బంలో కలిసిపోయింది. దేశ ప్రజల దగ్గర వున్న నిజమైన సొమ్ము తాలూకు లెక్కలు దాదాపుగా బయటకు వచ్చాయి.

కొత్తగా ట్యాక్స్‌ పేయర్స్‌ పెరిగారు. దురదృష్టవశాత్తూ మరింత తేలిగ్గా ఫేక్‌ కరెన్సీ దేశంలో అందుబాటులోకి వచ్చేయడం బాధాకరం. ఒక్క మాటలో చెప్పాలంటే, ఆలోచన మంచిదే అయినా.. డిమోనిటజైషన్‌ నిజంగానే ఓ పెద్ద డిజాస్టర్‌గా మిగిలిపోయింది. చట్ట సభల వేదికగా, దేశ ప్రజలకు ప్రధాని నరేంద్ర మోడీ సంజాయిషీ ఇచ్చుకోలేని పరిస్థితిని డెమోనిటైజేషన్‌ తీసుకొచ్చింది.