జగన్ ఆ ఛాన్స్ వినియోగించుకుంటారా?

‘‘తెలంగాణ నుంచి మరో ఆంధ్రా పార్టీ తుడిచిపెట్టుకుని పోయింది’’ – ఇదీ 2016లో వైఎస్సార్ సీపీని ఉద్దేశించి మంత్రి కేటీఆర్ చేసిన వ్యాఖ్య. అప్పటి జీహెచ్ఎంసీ ఎన్నికల్లో పోటీ చేయకూడదని వైఎస్సార్ సీపీ నిర్ణయం తీసుకున్నప్పుడు కేటీఆర్ అలా వ్యాఖ్యానించారు. తెలంగాణ సాధించిన పార్టీగా టీఆర్ఎస్ కు ప్రజలు పట్టం గట్టడంతోపాటు జీహెచ్ఎంసీ ఎన్నికల్లోనూ వారినే గెలిపించారు. ఇక అప్పటి నుంచి తెలంగాణలో జరిగిన ఏ ఎన్నికల్లోనూ వైఎస్సార్ సీపీ పోటీ చేయలేదు. అయితే, ప్రస్తుతం పరిస్థితులు మారాయి. కేసీఆర్ పాలనపై పలు వర్గాలు అసంతృప్తితో ఉన్నాయి. పైగా పలు అంశాల్లో పొరుగు రాష్ట్రం ఏపీతో పోలికలు మొదలయ్యాయి.

కేసీఆర్ సర్కారు కంటే జగన్ సర్కారు ఎన్నో రెట్లు మేలనే భావన తెలంగాణలో వ్యాప్తి చెందుతోంది. ఉద్యోగులు, యువత, విద్యార్థులు, రైతుల విషయంలో జగన్ సర్కారు చర్యలు అభినందనీయం అంటూ సోషల్ మీడియాలో సందేశాలు వెల్లువెత్తుతున్నాయి. పాలన చేపట్టిన నాలుగు నెలల్లోనే హామీలు నెరవేరుస్తూ దూకుడుగా ముందుకెళ్తున్నారంటూ జగన్ పై ప్రశంసల వర్షం కురిపిస్తున్నారు. ప్రత్యేక రాష్ట్రం వస్తే కనీసం రెండు లక్షల ఉద్యోగాలు వస్తాయని ఉద్యమ సమయంలో కేసీఆర్ ప్రకటించారు. తీరా రాష్ట్రం వచ్చాక జరిపిన ప్రభుత్వ నియామకాలు అంతంత మాత్రమే.

ఈ విషయంలో విద్యార్థులు, నిరుద్యోగుల్లో ఎప్పటి నుంచో అసంతృప్తి గూడు కట్టుకుని ఉంది. మరోవైపు జగన్ అధికారంలోకి వచ్చిన రెండు నెలల్లోనే చిన్నవో, పెద్దవో దాదాపు లక్షన్నర ఉద్యోగాలను భర్తీ చేశారు. తెలంగాణలో మాత్రం ఉద్యోగ నియామకాల నోటిఫికేషన్ల కోసం నిరుద్యోగులు ఎదురుచూస్తున్నారు. ఇక ఉద్యోగుల విషయంలోనూ జగన్ సర్కారు సానుకూలంగానే వ్యవహరించి ఐఆర్ ప్రకటించింది. ఆర్టీసీని ప్రభుత్వంలో విలీనం చేసింది. తెలంగాణలో మాత్రం కేసీఆర్ సర్కారు వీటిని పట్టించుకోవడంలేదు.

ఈ నేపథ్యంలో తెలంగాణలో జగన్ పై ప్రశంసలు, కేసీఆర్ పై విమర్శలు వ్యక్తమవుతున్నాయి. ఆర్టీసీ సిబ్బంది సైతం జగన్ అనుకూల నినాదాలు చేస్తూ కేసీఆర్ పై విరుచుకుపడుతున్నారు. ఈ నేపథ్యంలో తెలంగాణలో వైఎస్సార్ సీపీ పునరుజ్జీవం చెందడానికి ఇదే సరైన సమయం అని పలువురు పేర్కొంటున్నారు. జగన్ ఈ విషయంపై దృష్టి సారించి 2021లో జరిగే జీహెచ్ఎంసీ ఎన్నికల్లో పోటీకి దిగాలని పలువురు సూచిస్తున్నారు.

సోషల్ మీడియా వేదికగా వేలాది మంది ఈ మేరకు పోస్టులు పెడుతున్నారు. అయితే, జగన్ ఈ విషయంలో ఎలా స్పందిస్తారో అన్న చర్చ అప్పుడే మొదలైంది. ప్రస్తుతం ఇద్దరు ముఖ్యమంత్రుల మధ్య సన్నిహిత సంబంధాలు ఉన్న నేపథ్యంలో జగన్ కీలక నిర్ణయం తీసుకునే అవకాశాలు చాలా తక్కువనే అభిప్రాయాలు వ్యక్తమవుతున్నాయి. కేసీఆర్ ను పెద్దన్నగా భావిస్తున్న జగన్.. ఆయనకు వ్యతిరేకంగా వెళ్లే అవకాశం లేదని అంటున్నారు. ముందు ముందు పరిస్థితుల్లో ఏమైనా మార్పులు వస్తే మినహా.. తెలంగాణలో టీఆర్ఎస్ కి వ్యతిరేకంగా జగన్ పోటీ చేసే ఛాన్స్ ఉండకపోవచ్చని పలువురు విశ్లేషిస్తున్నారు.