చంద్రబాబు ఇంటి కూల్చివేతకు రంగం సిద్ధం

తెలుగుదేశం పార్టీ అధినేత, ఆంధ్రప్రదేశ్‌ మాజీ ముఖ్యమంత్రి నారా చంద్రబాబునాయుడు నివాసాన్ని కూల్చివేసేందుకు వైఎస్‌ జగన్‌ సర్కార్‌ రంగం సిద్ధం చేసింది. కృష్ణా నది ఒడ్డున కరకట్టకు ఆనుకుని ఉండవల్లిలో నిర్మితమైన లింగమనేని ఎస్టేట్‌ భవనంలో చంద్రబాబు నివాసం వుంటోన్న విషయం విదితమే. ఆంధ్రప్రదేశ్‌ ముఖ్యమంత్రిగా 2014 ఎన్నికల్లో గెలిచాక, ఈ ఇంటినే అధికారిక భవనంగా చేసుకున్నారాయన. అయితే, అది అక్రమ కట్టడమంటూ మొదటి నుంచి వైఎస్సార్సీపీ ఆరోపిస్తోంది.

వైసీపీ అధికారంలోకి వచ్చిన వెంటనే, చంద్రబాబు ఇంటి కూల్చివేత దిశగా చర్యలు మొదలు పెట్టడం గమనార్హం. ముందుగా ప్రజా వేదికను కూల్చేసిన వైసీపీ సర్కార్‌, చంద్రబాబు నివాసంతోపాటు కరకట్టకు ఆనుకుని వున్న చాలా ప్రైవేటు భవనాలకు నోటీసులు పంపింది. మిగతావాటి సంగతెలా వున్నా, చంద్రబాబు ఇంటి మీద వైసీపీ సర్కార్‌కి ఫోకస్‌ ఎక్కువైనట్లు కన్పిస్తోంది.

మొన్నటికి మొన్న వరదల సమయంలో మంత్రులు, అధికార పార్టీ నేతలంతా చంద్రబాబు ఇంటి చుట్టూ చక్కర్లు కొట్టిన విషయం విదితమే. తాజాగా, చంద్రబాబు ఇంటికి మరోసారి నోటీసులు ఇచ్చిన వైసీపీ సర్కార్‌, ఏడు రోజుల్లో అక్రమ నిర్మాణాల్ని తొలగించాలనీ, లేదంటే తామే రంగంలోకి దిగి కూల్చేస్తామని ఆ నోటీసుల్లో హెచ్చరికలు జారీ చేశారు. అయితే, భవన యజమాని లింగమనేని రమేష్‌ మాత్రం, భవనానికి అన్ని అనుమతులూ వున్నాయంటున్నారు.

తాము భవనం నిర్మించే సమయంలో పంచాయితీ అనుమతి తీసుకున్నామనీ, అక్రమ నిర్మాణంగా వైసీపీ చెబుతున్న స్విమ్మింగ్‌ పూల్‌కి సైతం అనుమతులున్నాయని ఆయన ఇప్పటికే స్పష్టతనిచ్చారు. మొత్తమ్మీద, రాష్ట్రంలో ఇంకేవీ సమస్యలే లేనట్లు.. చంద్రబాబు ఇంటి కారణంగానే రాష్ట్రానికి అతి పెద్ద సమస్య వచ్చినట్లు.. వైసీపీ సర్కార్‌ వ్యవహరిస్తోందన్న విమర్శలు వెల్లువెత్తుతున్నాయి.