నవరత్నాల తరహాలో వైసీపీకి 9 అసెంబ్లీ సీట్లు మాత్రమేనా.?

‘మాకు 2019 ఎన్నికల్లో 23 అసెంబ్లీ సీట్లు మాత్రమే రావడం దేవుడి స్క్రిప్ట్ అయితే, మీకు వచ్చే ఎన్నికల్లో నవరత్నాల తరహాలో కేవలం 9 అసెంబ్లీ సీట్లు మాత్రమే వస్తాయ్..’ అంటూ వైసీపీ మీద తెలుగుదేశం పార్టీకి చెందిన మద్దతుదారులు కొందరు సోషల్ మీడియా వేదికగా వెటకారం చేస్తున్నారు.

కానీ, వైసీపీ లెక్క వేరే.! ‘2019 ఎన్నికల్లో 151 సీట్లు కొల్లగొట్టాం.! ఈసారి 175 సీట్లనూ కైవసం చేసుకోబోతున్నాం..’ అని వైసీపీ అంటోంది. జాతీయ స్థాయిలో జరుగుతోన్న పలు సర్వేలు చెబుతున్నదేంటంటే, టీడీపీ పుంజుకుందనీ, వైసీపీ కొన్ని సీట్లను కోల్పోబోతోందని. ఈ సర్వేల్లో నిజమెంత.? అన్న విషయాన్ని పక్కన పెడితే, దాదాపు ఏడు వరకు లోక్ సభ సీట్లను వైసీపీ కోల్పోబోతోందన్నది అన్ని సర్వేలూ చెబుతన్నమాట.

ఇంతకీ, ఏది నిజం.? నవరత్నాలంటే తొమ్మిది రత్నాలు అని.! ఆ తొమ్మిది రత్నాలు మాత్రమే, అంటే ఆ సంఖ్యలో మాత్రమే వచ్చే ఎన్నికల్లో వైసీపీకి ఎమ్మెల్యేలు దక్కనున్నారని నమ్మగలమా.? ఏమో, రాజకీయాల్లో ఏదైనా జరగొచ్చు.

అందలమెక్కించడం, పాతాళానికి తొక్కేయం.. ఇదంతా ప్రజల చేతుల్లోనే వుంది. 2019 ఎన్నికల్లో ఓటర్లను ఎడాపెడా వైసీపీ కొనేసిందన్న విమర్శలున్నాయి. దానికి తోడు, చాలా అంశాలు వైసీపీకి సహకరించాయి. అందులో, టీడీపీ పట్ల వ్యతిరేకత.. అదే సమయంలో బీజేపీ నుంచి తెరవెనుకాల వైసీపీకి మద్దతు.. జనసేన మీద టీడీపీ అలాగే వైసీపీ కలిసి చేసిన దుష్ప్రచారం.. ఇవన్నీ ఆ ఎన్నికల్లో కీలక భూమిక పోషించాయి.

రాష్ట్రంలో గడచిన మూడున్నరేళ్ళలో.. అందునా, గడచిన రెండేళ్ళలో ఈక్వేషన్స్ అనూహ్యంగా మారాయ్.! ఎంతలా మారాయంటే, వైసీపీ అంచనాలు తల్లకిందులయ్యేలా. టీడీపీ సైతం విస్తు పోయేలా.! ముమ్మాటికీ జనసేన పార్టీ రాష్ట్ర రాజకీయాల్లో పెను మార్పులకు కారణమయ్యేలా వుంది. ఆ మార్పు ఏ స్థాయిలో వుండబోతోంది.? అన్నదే చర్చ ఇక్కడ.

ఇంకో ఆర్నెళ్ళలో ఈ మార్పులు మరింత స్పష్టంగా కనిపించబోతున్నాయ్. అందుకే, దుష్ట చతుష్టయం.. దానికి తోడు దత్త పుత్రుడు.. అంటూ వైసీపీ అధినేత వైఎస్ జగన్ ఒకింత అసహనానికి గురవుతున్నారు. మరీ, 9 అసెంబ్లీ సీట్లకే వైసీపీ పరిమితమవుతుందని అనలేంగానీ, అధికారం కోల్పోయే స్థాయికి వైసీపీ పడిపోవచ్చు. ఒకవేళ టీడీపీ భావిస్తున్నట్లుగా దేవుడి స్క్రిప్ట్ ఫలిస్తే.. ఏమో, 9 అసెంబ్లీ సీట్లకే వైసీపీ పరిమితమైపోతుందేమో కూడా.!