కాలయముడు: వాలంటీరూ.. టీడీపీ నాయకుడూ.. ఏది నిజం.?

తూర్పుగోదావరి జిల్లాలో జీలుగు కల్లు తాగి ఐదుగురు ప్రాణాలు కోల్పోయిన ఘటన రాష్ట్రంలో పెను సంచలనానికి కారణమయ్యింది. ఈ కేసులో ఓ వ్యక్తిని పోలీసులు అదుపులోకి తీసుకున్నారు. ఓ మహిళతో అక్రమ సంబంధం ఈ దారుణానికి కారణంగా పోలీసులు తేల్చారు. సదరు కాలయముడు ఏ పార్టీకి చెందినవాడన్నదానిపై ఏపీ రాజకీయాల్లో జరుగుతున్న రచ్చ అంతా ఇంతా కాదు.

నిందితుడు రాంబాబుని పోలీసులు అరెస్టు చేయగా, అతను తూర్పుగోదావరి జిల్లా రాజవొమ్మంగి మండలం లోదొడ్డి గ్రామ సచివాలయ వాలంటీరు వంతల రాంబాబు అని తెలుగుదేశం పార్టీ, ఆ పార్టీ అనుకూల మీడియా అంటోంది. మరోపక్క, వంతల రాంబాబుని టీడీపీ నాయకుడిగా వైసీపీ, ఆ పార్టీ అనుకూల మీడియా చిత్రీకరిస్తోంది.

ఇంతకీ ఏది నిజం.? ‘వాలంటీర్ పోస్టులన్నిటినీ వైసీపీ కార్యకర్తలకు ఇచ్చుకున్నాం..’ అని కొన్నాళ్ళ క్రితం వైసీపీ ముఖ్య నేత, ఆ పార్టీ జాతీయ ప్రధాన కార్యదర్శి, రాజ్యసభ సభ్యుడు విజయసాయిరెడ్డి ప్రకటించుకోవడం అప్పట్లో వివాదాస్పదమైన విషయం విదితమే.

ఆ లెక్కన, వంతల రాంబాబు అనే వాలంటీరు వైసీపీకి చెందిన వ్యక్తి అనుకోవాలేమో. లేదూ, వైసీపీ ఆరోపిస్తున్నట్టు వంతల రాంబాబు, టీడీపీ నేత అయి వుంటే, వైసీపీ – టీడీపీ మధ్య తెరవెనుక ‘అవగాహన’లో భాగంగానే, టీడీపీ రాజకీయ నిరుద్యోగులకు వైసీపీ హయాంలో ‘కీలక అవకాశాలు’ దక్కుతున్నాయని అనుకోవాలేమో.

సరే, దుర్మార్గులు ఏ పార్టీలో అయినా వుండొచ్చు. అలాంటివారిపై ఆయా పార్టీలు సందర్భానుసారం చర్యలు తీసుకోవడమనేది సర్వసాధారణమైన విషయం. నేరం బయటపడ్డాక కూడా, ఈ రాజకీయాలేంటి.? కీలక పదవుల్లో వున్నవారే, కోర్టుల చుట్టూ తిరుగుతున్నప్పుడు.. కింది స్థాయి కార్యకర్తలపై నేరాభియోగాలు, దాని చుట్టూ రాజకీయమంటే, నవ్విపోదురుగాక మనకేటి.? అన్నట్టే అనిపిస్తుంటుంది రాజకీయ నాయకుల్ని చూశాక.

ఒక్కటి మాత్రం నిజం.. వాలంటీర్లపై చాలా చాలా అనుమానాలు, వివాదాలున్నాయి. ఎప్పటికప్పుడు వాలంటీర్ల అఘాయిత్యాలపై వార్తలొస్తునన దరిమిలా, వాలంటీర్ వ్యవస్థను ప్రక్షాళన చేయాల్సిన అవసరం వుంది. కానీ, వాలంటీర్లలో మెజార్టీ వైసీపీ కార్యకర్తలే గనుక ప్రక్షాళన జరిగేందుకు ఆస్కారమే లేదు.