381 ఈవీఎంలలోనే సమస్యలు: ద్వివేది

ఆంధ్రప్రదేశ్ అసెంబ్లీ ఎన్నికల పోలింగ్ సందర్భంగా ఈవీఎంలపై వస్తున్న వదంతులు నమ్మవద్దని ఏపీ ఎన్నికల ప్రధానాధికారి గోపాలకృష్ణ ద్వివేది స్పష్టంచేశారు. ఒకరికి ఓటు వేస్తే మరొకరికి వెళ్తుందడనం పూర్తిగా అవాస్తమన్నారు. పోలింగ్ సందర్భంగా అమరావతిలోని తన కార్యాలయంలో ఆయన గురువారం మధ్యాహ్నం 2 గంటలకు మీడియాతో మాట్లాడారు. ఈ సందర్భంగా ఈవీఎంలపై వస్తున్న అపోహల గురించి వివరణ ఇచ్చారు. రాష్ట్రవ్యాప్తంగా 30 శాతం ఈవీఎంలు పనిచేయలేదని, కొన్నిచోట్ల తెలుగుదేశం పార్టీకి ఓటేస్తే, వైఎస్సార్ సీపీకి పడుతోందని టీడీపీ అధినేత చంద్రబాబు ఆరోపించిన సంగతి తెలిసిందే.

వీటిని మీడియా ప్రతినిధులు ద్వివేది వద్ద ప్రస్తావించగా.. ఆయన వాటిని తోసిపుచ్చారు. రాష్ట్రవ్యాప్తంగా మొత్తం 381 ఈవీఎంలలో మాత్రమే సమస్యలు వచ్చాయని, వాటిని తమ ఇంజనీర్లు సరిచేశారని తెలిపారు. కనెక్షన్లు సక్రమంగా ఇవ్వకపోవడం వల్ల మాత్రమే సమస్యలు తలెత్తాయన్నారు. అస్సలు ఈవీఎంలు పనిచేయని సంఘటనలు కేవలం 30లోపే ఉంటాయని, అలాంటిచోట్ల కొత్త యూనిట్లు పెట్టి పోలింగ్ నిర్వహిస్తున్నారని వెల్లడించారు.

ఇక ఒక పార్టీకి ఓటేస్తే మరో పార్టీకి ఓటు పడుతోందనడం సరికాదన్నారు. అన్ని పార్టీల ఏజెంట్ల సమక్షంలో మాక్ పోలింగ్ నిర్వహించి, అంతా సక్రమంగా ఉందని వారు భావించిన తర్వాతే పోలింగ్ మొదలుపెట్టామని స్పష్టంచేశారు. అందువల్ల అలాంటి పరిస్థితి తలెత్తే పరిస్థితి ఉండదన్నారు. మాక్ పోలింగ్ లో సక్రమంగా ఉన్న ఈవీఎంలు తర్వాత ఎలా మారిపోతాయని ప్రశ్నించారు. ఒకవేళ ఎక్కడైనా అలా జరిగితే, అక్కడి అధికారులు టెస్ట్ ఓట్ వేసి, దాన్ని నిర్ధారించుకునే అవకాశం కూడా ఉందన్నారు.

అందువల్ల ఇలాంటి వదంతులను ఎవరూ నమ్మవద్దని కోరారు. అక్కడక్కడా ఈవీఎంలు పనిచేయకపోవడం నిజమే అయినా, అది చాలా తక్కువేనన్నారు. సాయంత్రం 6 గంటల వరకు క్యూ లైన్లో ఉన్నవారు ఎంత మంది ఉన్నప్పటికీ వారంతా తమ ఓటు హక్కు వినియోగించుకోవచ్చని ద్వివేది స్పష్టంచేశారు. సాయంత్రం 6 గంటలకు లైన్లో ఉన్నవారి కోసం రాత్రి ఎంత సేపటి వరకైనా పోలింగ్ నిర్వహిస్తామన్నారు. అయితే, ఓటు వేయాలనుకుంటే మాత్రం ఎట్టి పరిస్థితుల్లోనూ 6 గంటల కంటే ముందుగానే లైన్లో ఉండాలని స్పష్టంచేశారు. ఈవీఎంల పనితీరుపై వస్తున్న వదంతులను నమ్మవద్దని సూచించారు.