ఏదన్నా కుటుంబం కలిసి మెలిసి వుంటే, చూసి ఓర్చుకోలేని నైజం వైఎస్సార్ కాంగ్రెస్ పార్టీది. వైఎస్ జగన్ మోహన్ రెడ్డిని ఆయన తల్లి దూరం పెట్టడం చూస్తున్నాం. సోదరి షర్మిల అయితే, ఏకంగా అన్న వైఎస్ జగన్ మోహన్ రెడ్డికి రాజకీయ ప్రత్యర్థిగా మారిపోయారు.
ఇదంతా వైఎస్ జగన్ స్వయంకృతాపరాదం. 2019 ఎన్నికల సమయంలో, అంతకు ముందు.. అటు విజయమ్మనీ, ఇటు షర్మిలనీ.. వైఎస్సార్ కాంగ్రెస్ పార్టీ రాజకీయ అవసరాల కోసం వాడుకున్నారు వైఎస్ జగన్. అధికారంలోకి రాగానే, తల్లినీ, చెల్లినీ.. పార్టీ నుంచి దూరంగా నెట్టేశారు.
పైగా, జనంలోకి వెళ్ళి, ‘మీ బిడ్డ ఒంటరి’ అంటూ మొసలి కన్నీరు కార్చుతున్నారు. ఇప్పుడిదంతా ఎందుకంటే, చిరంజీవి – పవన్ కళ్యాణ్ మధ్య చిచ్చు పెట్టేందుకు గడచిన ఐదేళ్ళుగా వైసీపీ చేసిన ప్రయత్నాలు అన్నీ ఇన్నీ కావు. కానీ, ఆ ప్రయత్నాలన్నీ బెడిసి కొట్టాయి.
మొన్నీమధ్యనే చిరంజీవి, తన సోదరుడు పవన్ కళ్యాణ్కి ఐదు కోట్ల రూపాయల విరాళం అందించారు.. జనసేన పార్టీ తరఫున కౌలు రైతులకు చేస్తున్న సాయం నిమిత్తం. తాజాగా, ‘కొణిదెల పవన్ కళ్యాణ్ పిఠాపురం ఎమ్మెల్యేగా గెలవాలి..’ అని ఆకాంక్షిస్తూ ఓ వీడియో విడుదల చేశారు చిరంజీవి.
‘అకారణంగా రాజకీయాల్లో పడకూడని మాటలు పడుతున్నాడు నా తమ్ముడు..’ అంటూ చిరంజీవి, ఈ వీడియోలో ఆవేదన వ్యక్తం చేశారు. ‘జనమే జయం..’ అంటూ పవన్ కళ్యాణ్ గెలుపుని ఆకాంక్షించారు చిరంజీవి ఈ వీడియోలో.
నిజానికి, చిరంజీవి ఈ వీడియోలో ఎవర్నీ విమర్శించింది లేదు. తోడబుట్టిన తమ్ముడికి మాట సాయం చేశారంతే.! తమ కుటుంబ సభ్యుడు రాజకీయంగా ఎదగాలని కోరుకోవడం తప్పెలా అవుతుంది.? కానీ, వైసీపీ మాత్రం, చిరంజీవి పెద్ద నేరం చేశాడన్నట్టుగా సోషల్ మీడియా వేదికగా పస లేని వాదనల్ని తెరపైకి తెస్తోంది.
చిరంజీవితోపాటు, మరో సినీ నటుడు నాని కూడా, జనసేన అధినేత పవన్ కళ్యాణ్కి మద్దతు పలికాడు. ‘హనుమాన్’ హీరో తేజ సజ్జ సైతం, జనసేనాని విజయం సాధించాలని ఆకాంక్షిస్తూ సోషల్ మీడియా వేదికగా స్పందించాడు. నిర్మాత నాగవంశీ, జనసేనాని గెలుపును ఆకాంక్షిస్తూ పిఠాపురం వెళ్ళారు.
ఇదిలా వుంటే, సినీ పరిశ్రమ తరఫున మరికొంతమంది ప్రముఖులు, జనసేన అధినేత పవన్ కళ్యాణ్కి మద్దతుగా నిలిచేందుకు ముందుకు రానున్నట్లు తెలుస్తోంది. అందరిపైనా, వైసీపీ మార్కు ట్రోలింగ్ అయితే నిస్సిగ్గుగా షురూ అయ్యింది.
ఇదిలా వుంటే, తమ్ముడి గెలుపుని కాంక్షిస్తూ మెగాస్టార్ చిరంజీవి, పిఠాపురం వెళతారనే ప్రచారం జరుగుతున్నా, ఆ వార్తల్లో నిజం లేదని తెలుస్తోంది. అన్నట్టు, రామ్ చరణ్ కూడా తన ట్విట్టర్ హ్యాండిల్లో చిరంజీవి వీడియోను పోస్ట్ చేయడం గమనార్హం.