YS Jagan: సీఎం కి కోర్టుకు రావడం నామోషీ ఏమో?

YS Jagan: కోడి కత్తి కేసులో నిందితుడు శ్రీనివాసరావు తరపు న్యాయవాది సలీం ఎన్ఐఏ న్యాయస్థానం ఎదుట కీలక వ్యాఖ్యలు చేశారు. ఈ కేసులో మరింత దర్యాప్తు అవసరమంటూ సీఎం జగన్మోహన్ రెడ్డి( Jagan Mohan Reddy) తరపు న్యాయవాది ఇంకొల్లు వెంకటేశ్వరరావు వేసిన పిటిషన్ పై ఆయన కౌంటర్ దాఖలు చేశారు. ఈ సందర్భంగా ఆయన వేసిన కౌంటర్లో కీలక అంశాలు చర్చించారు.

‘ సీఎంకు కేసు విచారణ పై ఆసక్తి లేదు. న్యాయస్థానం ఎదుట హాజరవ్వకుండా తప్పించుకునేందుకు లాజిక్ లేని కారణాలు చెబుతున్నారు. న్యాయస్థానానికి కేవలం 20 కిలోమీటర్ల దూరంలో ఉన్న ఆయన..కోర్టు ముందుకు రావడానికి ఆయన సుముఖంగా లేరు. చట్టాన్ని ఆయన ఎంత గౌరవిస్తున్నారనేది అర్థమవుతోంది. చట్టానికి ఎవరు అతీతులు కారనే విషయాన్ని ఆయన గుర్తుంచుకోవాలి. సీఎం అయినంత మాత్రాన కోర్టు ముందు హాజరు కావడం నామోషీగా భావిస్తున్నారేమో. కొన్నాళ్లుగా వివిధ కోణాల్లో ఈ కేసు పై దర్యాప్తు కొనసాగుతున్నప్పటికీ కొత్త విషయాలేవీ బయటకి రాలేదు. ఎయిర్పోర్ట్ అసిస్టెంట్ కమాండెంట్ దినేష్ కుమార్ ను విచారించినప్పుడు కూడా కొత్త అంశాలు ఏవి వెల్లడి కాలేదు. ఎన్ఐఏ దాఖలు చేసిన అభియోగపత్రంలోనూ కొత్త అంశాలు వెలుగులోకి వచ్చాయని గాని, మరింత దర్యాప్తు అవసరమని గాని ఎక్కడ ప్రస్తావించలేదు. అలాంటప్పుడు ఇప్పటికే పూర్తయిన దర్యాప్తును పక్కనపెట్టి మరింత సమయం కావాలని కోరడం నేర విచారణ ప్రక్రియను కించపరచినట్టే అవుతుంది. బాధితుడు సీఎం జగన్ కోర్టు ఎదుట హాజరుకావాలని ఇప్పటికే సమన్లు జారీ అయ్యాయి. అయినప్పటికీ ఆయన నేరుగా కోర్టు ముందు విచారణ కాకుండా వీడియో కాన్ఫరెన్స్ ద్వారా సాక్ష్యం నమోదు చేయాలంటూ పిటిషన్లో అభ్యర్థించడం సహితుకంగా లేదు. ఇలాంటి పిటిషన్ పై న్యాయస్థానం ఔదార్యం చూపించాల్సిన అవసరం లేదు. ఏ స్థాయి వ్యక్తికైనా చట్టం అత్యున్నతమైనదని గుర్తుంచుకొని ఈ పిటిషన్ కొట్టివేయాలి’ అని పేర్కొన్నారు.

మరోవైపు ఈ కేసులో కుట్ర కోణం లేదంటూ జాతీయ దర్యాప్తు సంస్థ తాజాగా తేల్చి చెప్పింది. నిందితుడు ఏ పార్టీకి చెందిన వాడు కాదని స్పష్టం చేసింది. కుట్ర కోణం సహా అన్ని కోణాల్లోనూ కేసు దర్యాప్తు చేశామని తదుపరి దర్యాప్తు అవసరం లేదని.. సిఎం జగన్ వేసిన పిటిషన్ లని కొట్టివేయాలని ఎన్ఐఏ కౌంటర్ అఫిడవిట్ దాఖలు చేసింది.