తిరుపతి ఓటర్లకు ముఖ్యమంత్రి లేఖలు.. ప్రత్యేక హోదా సంగతో మరి.!

తిరుపతి ఉప ఎన్నిక నేపథ్యంలో అధికార వైఎస్సార్ కాంగ్రెస్ పార్టీ సరికొత్త రీతిలో ఓటర్లను ఆకర్షించేందుకు సమాయత్తమవుతోంది. ముఖ్యమంత్రి వైఎస్ జగన్ మోహన్ రెడ్డి పేరుతో, ఓటర్లకు లేఖలు రాస్తోంది వైసీపీ. అధికారంలోకి వచ్చాక 22 నెలల్లో చాలా సంక్షేమ కార్యక్రమాలు చేపట్టామనీ, ఆ సంక్షేమ కార్యక్రమాల ద్వారా లబ్ది పొందినవారు, వైసీపీని తిరుపతి ఉప ఎన్నికలో గెలిపించాలని ఆ లేఖని సిద్ధం చేశారు.

ముఖ్యమంత్రి వైఎస్ జగన్ మోహన్ రెడ్డి ఓ లేఖ మీద సంతకం కూడా చేశారు. ఆ లేఖలు, ఇంటింటికీ వెళ్ళబోతున్నాయట. అమ్మ ఒడి సహా అనేక సంక్షేమ పథకాలు వైఎస్ జగన్ హయాంలో తెరపైకొచ్చిన మాట వాస్తవం. అయితే, అందులో ఏ ఒక్క పథకమైనా వైఎస్సార్ కాంగ్రెస్ పార్టీ సొంత నిథులతో అమలు చేస్తోందా.? అన్న ప్రశ్న ఓటర్లలో కలగడం సహజమే. పైగా, ఆ సంక్షేమ పథకాల పేరుతో కోట్లు వెచ్చించి అధికార వైసీపీ పబ్లసిటీ స్టంట్లు చేసింది. ఈ పబ్లిసీటీ కోసం చేసిన ఖర్చు కూడా ప్రభుత్వ ఖజానా నుంచి జరిగిందే.

రాజకీయాల్లో ఇవన్నీ మామూలే. చంద్రన్న ఇచ్చాడు.. జగనన్న ఇచ్చాడు.. అని ఆయా పార్టీలు చెబుతోంటే, ‘నీ జేబుల్లోంచి ఏమన్నా తీసిచ్చావా.?’ అని ప్రజలు లోలోన ప్రశ్నిస్తారు తప్ప, బయటకు వినిపించేలా ఆ ప్రశ్నల్ని సంధించే పరిస్థితి లేదు. ప్రశ్నిస్తే, పథకాలు లేపేస్తాం.. అనే స్థాయికి అధికారంలో వున్నోళ్ళు దిగజారిపోతున్నారాయె.

సరే, ఆ విషయాల్ని పక్కన పెడదాం. గడచిన రెండేళ్ళలో ప్రత్యేక హోదా ఎందుకు తీసుకురాలేకపోయిందట వైసీపీ.? కేంద్రం మెడలు వంచుతామని 2019 ఎన్నికల్లో బీరాలు పలికిన వైసీపీ, అధికారంలోకి వచ్చాక.. కుక్కిన పేనులా కేంద్రం వద్ద ఎందుకు వ్యవహరిస్తున్నట్లు.? పెట్రో ధరల్ని ఎందుకు పెంచుతున్నట్లు.? అభివృద్ధి ఎందుకు జరగడంలేదు.? ఇలాంటి చాలా ప్రశ్నలకు సమాధానాలు చెప్పాల్సింది అధికార వైసీపీనే.

అన్నిటికీ మించి.. అప్పులు చేసి సంక్షేమ పథకాలు అమలు చేస్తున్న దరిమిలా, ఆ అప్పుల భారం మోసేది ప్రజలా.? లేదంటే వైఎస్సార్ కాంగ్రెస్ పార్టీనా.? అన్నదానికీ ముఖ్యమంత్రి వైఎస్ జగన్ మోహన్ రెడ్డి సమాధానమిస్తూ, తిరుపతి ఓటర్లకు లేఖ రాస్తే బావుంటుందేమో.