దుగ్గిరాల దుర్మార్గ రాజకీయం: వైసీపీ పాలనలో అంతే మరి.!

స్థానిక ఎన్నికల్లో వైసీపీ ఎంత గొప్పగా గెలిచేసిందో చెప్పడానికి ఇదొక ఉదాహరణ మాత్రమే. ఇతర పార్టీల అభ్యర్థుల్ని బెదిరించారు.. దాడులు చేశారు.. అధికారాన్ని అడ్డం పెట్టుకుని అడ్డగోలు రాజకీయం చేశారు. ఇంతా చేసినా కొన్ని చోట్ల చుక్కెదురవడంతో అక్కడా నిస్సిగ్గు రాజకీయమే చేస్తున్నారు. ప్రజాస్వామ్యంలో దీన్ని గెలుపు.. అనాల్సి వస్తే, అంతకన్నా హాస్యాస్పదం ఇంకేముంటుంది.?

గుంటూరు జిల్లా దుగ్గిరాల మండల ప్రజాపరిషత్తు ఎన్నికలకు సంబంధించి హైడ్రామా నెలకొంది. వైసీపీకి చెందిన ఓ ఎంపీటీసీ సభ్యురాలు తాడిబోయిన పద్మావతి కిడ్నాప్‌కి గురయ్యారట. ఈ విషయాన్ని స్వయానా ఆమె తనయుడు వెల్లడించడం గమనార్హం. వైసీపీ ఎమ్మెల్యే ఆళ్ళ రామకృష్ణారెడ్డి అనుచరులే తన తల్లిని కిడ్నాప్ చేశారన్నది పద్మావతి తనయుడి ఆరోపణ.

తాడిబోయిన పద్మావతి ఎంపీపీ పదవికి పోటీ చేయాలనుకుంటున్నారట. కానీ, అందుకు వైసీపీ అధినాయకత్వం సుముఖంగా లేదు. ఈ నేపథ్యంలో ఆమె విపక్షాల మద్దతు తీసుకుంటారేమో అన్న అనుమానం వైసీపీ పెద్దల్లో పెరిగినట్లు తెలుస్తోంది.

మరోపక్క, మెజార్టీ సభ్యులు టీడీపీకి వున్నా, బీసీ రిజర్వుడు స్థానమైన దుగ్గిరాల ఎంపీపీ పదవిని పొందేందుకు సాంకేతిక పరమైన ఇబ్బందుల్ని ఎదుర్కొంటోంది తెలుగుదేశం పార్టీ. చిత్రమేంటంటే, జనసేన పార్టీకి వున్న ఓ సభ్యురాలు కూడా టీడీపీ వైపుకు వెళ్ళడం.

ఎలా చూసినా, సంఖ్యాబలం పరంగా టీడీపీ ముందంజలో వుందిగానీ, బీసీ సభ్యురాలు ఆ పార్టీకి లేకపోవడంతో, స్వతంత్రంగా పోటీ చేస్తే పద్మావతికి మద్దతిస్తామంటోంది టీడీపీ. ఈ నేపథ్యంలోనే పద్మావతిని వైసీపీ కిడ్నాప్ చేసిందనే ఆరోపణలు వెల్లువెత్తుతున్నాయి.

ఏలూరు జిల్లాలో ఇటీవల వైసీపీకి చెందిన గ్రామ స్థాయి నాయకుడ్ని వైసీపీలోని వైరి వర్గమే చంపేసిన సంగతి తెలిసిందే. అధికార పార్టీలో దుర్మార్గ రాజకీయం ఇలా తయారైంది మరి. ఇంతకీ పోలీసు వ్యవస్థ ఏం చేస్తోంది.? అంటే, అదంతే.! విపక్షాల మీద కేసులు పెట్టడానికి తప్ప, అధికార పార్టీ అరాచకాల్ని పోలీసు వ్యవస్థ పట్టించుకోవడంలేదన్నది టీడీపీ సహా ఇతర విపక్షాల ఆరోపణ.