హుజూర్ నగర్ లో కేసీఆర్ కు జగన్ సాయం?

ఏపీ సీఎం వైఎస్ జగన్ మోహన్ రెడ్డి ద్వారా పలు పనులు చక్కబెట్టుకుంటున్న టీఆర్ఎస్ అధినేత కేసీఆర్.. తాజాగా హుజూర్ నగర్ ఉప ఎన్నికలోనూ జగన్ సేవలను వినియోగించుకోవాలని నిర్ణయించుకున్నారా? ఆ విధంగా చర్యలు చేపట్టారా? అంటే ఔననే అంటున్నారు. ప్రస్తుతం తెలంగాణలో హుజూర్ నగర్ ఉప ఎన్నికపైనే అందరి దృష్టీ నెలకొంది. టీపీసీసీ చీఫ్ ఉత్తమ్ కుమార్ రెడ్డి ఎంపీగా ఎన్నిక కావడంతో గత అసెంబ్లీ ఎన్నికల్లో ఆయన గెలిచిన హుజూర్ నగర్ స్థానానికి ఉప ఎన్నిక అనివార్యమైంది.

ఉప ఎన్నికల ఫలితాలు అధికార పార్టీకి పరువు ప్రతిష్టలతో కూడుకున్నవి కావడంతో వాటిపై గట్టిగానే దృష్టి పెడతారు. పైగా అసెంబ్లీ ఎన్నికల తర్వాత వచ్చిన లోక్ సభ ఎన్నికల్లో అధికార టీఆర్ఎస్ అనుకున్న స్థాయిలో ప్రభావం చూపించలేకపోయింది. మరోవైపు ప్రస్తుతం ఉప ఎన్నికలు జరుగుతున్న స్థానం కాంగ్రెస్ కంచుకోట అయిన ఉమ్మడి నల్లగొండ జిల్లాలోది కావడంతో ఎలాగైనా అక్కడ గులాబీ జెండా ఎగరవేయాలని అధికార పార్టీ ఉవ్విళ్లూరుతోంది. ఇందుకు సంబంధించి ఇప్పటికే అన్ని విధాలుగా సమాయత్తమయ్యారు. అక్కడి ఇన్ చార్జిగా పల్లా రాజేశ్వర్ రెడ్డిని నియమించగా.. ఆయన క్షేత్రస్థాయికి వెళ్లిపోయి అప్పుడే పనులు ప్రారంభించేశారు.

మరోవైపు కేటీఆర్ కూడా అదే పనిలో నిమగ్నమయ్యారు. ఇక గులాబీ దళపతి సైతం ఈ ఎన్నికను ప్రతిష్టాత్మకంగా తీసుకున్నారు. ఇటీవల ఏపీ సీఎం జగన్ తో భేటీ అయినప్పుడు కూడా ఈ అంశం ప్రస్తావనకు వచ్చినట్టు సమాచారం. హుజూర్ నగర్ లో వైఎస్సార్ సీపీకి కూడా బాగానే అభిమానులు ఉన్నారు. గత ఎన్నికల్లో వైఎస్సార్ సీపీ పోటీ చేయకపోవడంతో వారు తమకు నచ్చిన పార్టీకి ఓటేశారు. వారిలో చాలామంది కాంగ్రెస్ వైపే మొగ్గు చూపారు. ఈ నేపథ్యంలో వారి ఓట్లను కొల్లగొట్టడానికి కేసీఆర్ పావులు కదిపారు.

మీ ఓటుబ్యాంకును మాకు మళ్లించడంటూ జగన్ ను అభ్యర్థించినట్టు సమాచారం. ఈ విషయంపై జగన్ ఏం హామీ ఇచ్చారో తెలియకున్నా.. దీనిని తమకు అనుకూలంగా మలుచుకోవాలని గులాబీ సైన్యం వ్యూహాలు రూపొందిస్తోంది. వైఎస్సార్ సీపీ నేతలుగా పేరున్నవారితో మాట్లాడి ఆ మేరకు వారిని ఒప్పించాలని యోచిస్తున్నట్టు తెలుస్తోంది. ఈ ప్రయత్నాలు ఎంతవరకు ఫలిస్తాయో చూడాలి.