జగన్‌ సారూ.. వాళ్ళు అక్కడెందుకు చచ్చిపోవడంలేదు.?

‘ఇసుకని మెషీన్లలో తయారు చేయరు.. అది ప్రకృతి ప్రసాదించిన వరం.. వరదలొచ్చినప్పుడు ఇసుక లభ్యత నదుల్లో తగ్గుతుంది.. అదే ఆంధ్రప్రదేశ్‌లో ఇసుక కొరతకు ప్రధాన కారణం..’ అని ఆంధ్రప్రదేశ్‌లోని వైఎస్సార్‌ కాంగ్రెస్‌ పార్టీ బుకాయింపులకు దిగుతోంది. ఏం, వరదలు ఒక్క ఆంధ్రప్రదేశ్‌లోనేనా.? మహారాష్ట్రలో వరదల సంగతేంటి.? తమిళనాడులో వరదల సంగతేంటి.? కర్నాటకలో వరదల గురించి ఏమంటారు.? అక్కడెందుకు ఆత్మహత్యలు లేవు.! అన్నదీ ఆలోచించాల్సిన విషయమే.

అక్కడిదాకా ఎందుకు పొరుగు రాష్ట్రం తెలంగాణలో లేని ఇసుక సమస్య, ఆంధ్రప్రదేశ్‌లోనే కన్పిస్తోంది. పైగా, ఇసు కొరత కారణంగా ఐదు నెలలుగా భవన నిర్మాణ రంగంలో ఉపాధి లేకుండా పోయింది కార్మికులకి. ఈ నేపథ్యంలో భవన నిర్మాణ కార్మికులు ఆత్మహత్య చేసుకుంటున్నారు. సమస్య ఇంత తీవ్రంగా వుంటే, రాష్ట్ర ప్రభుత్వం చాలా నిర్లక్ష్యపూరితమైన వ్యాఖ్యలు చేస్తోంది.

మంత్రులు, ఇతర ముఖ్య నేతలు చేస్తున్న వ్యాఖ్యలతో భవన నిర్మాణ రంగ కార్మికులు మరింతగా ఆందోళన చెందుతున్నారు. తమ వైఫల్యాన్ని కప్పిపుచ్చుకునే క్రమంలో ప్రజల ప్రాణాలు పోతున్నా ప్రభుత్వం పట్టించుకోకపోవడం దురదృష్టకరం. పొరుగు రాష్ట్రాలకు తరలిపోతున్న ఇసుకని అడ్డుకున్నా కొంతమేర రాష్ట్రంలో ఇసుక కొరత తగ్గుతుందన్న డిమాండ్లు సర్వత్రా వ్యక్తమవుతున్నా ప్రభుత్వం ఆ దిశగా దృష్టి సారించడంలేదు.

నిజానికి, ఇలాంటి పరిస్థితుల్లో ముఖ్యమంత్రిగా వైఎస్‌ జగన్‌ ప్రత్యక్షంగా రంగంలోకి దిగి, బాధిత వర్గాలకు బరోసా ఇవ్వాల్సి వుంటుంది. కానీ, ఆ భరోసా ముఖ్యమంత్రి నుంచి భవన నిర్మాణ రంగ కార్మికులకు కన్పించడంలేదు. జనసేన ఆరోపించినా, తెలుగుదేశం పార్టీ ప్రశ్నించినా, బీజేపీ నిలదీసినా, వాపక్షాలు ఆందోళన చేసినా.. ఇవన్నీ ప్రజల ప్రాణాలు పోతున్నాయనే. ఇలాంటి సందర్భాల్లో రాజకీయాల్ని పక్కన పెట్టి, ప్రభుత్వం పెద్దన్న పాత్ర పోషించాల్సి వుంది. దురదృష్టం, రాష్ట్రంలో అంత బాధ్యతాయుతమైన ప్రభుత్వం లేకుండా పోయింది.