వైద్య చికిత్స అందించేలోపు.. తొందరపడిన ఆ చిన్నారి కన్నుమూసిందేమో.!

ఫ్యాక్ట్ చెక్ కాదు.. ఫేక్ చెక్.. అంటున్నారు జనం.! విశాఖ కేజీహెచ్‌లో ఓ చిన్నారి మృతి చెందితే, పార్దీవ దేహాన్ని తరలించేందుకు ఆ చిన్నారి తల్లిదండ్రులు తమ ద్విచక్ర వాహనాన్ని ఆశ్రయించాల్సి వచ్చింది. బిడ్డను కోల్పోయిన దుఃఖంలోనే, ఆ చిన్నారి మృతదేహాన్ని.. సుమారు 120 కిలోమీటర్ల దూరం ఆ ద్విచక్ర వాహనం మీదనే తల్లిదండ్రులు తరలించారు.

ఇంతకీ, ఇలాంటి సందర్భాల్లో ఉపయోగపడాల్సిన అంబులెన్సులు ఏమైనట్టు.? ఆ ఒక్కటీ అడక్కూడదు. ‘అంబులెన్సు వచ్చేదాకా ఆగకుండా, ఎవరి మాటా వినకుండా ఆ చిన్నారి తల్లిదండ్రులు.. ఆ చిన్నారి మృతదేహాన్ని ద్విచక్ర వాహనంపై బలవంతంగా తీసుకెళ్లారు..’ అంటున్నారు సంబంధిత అధికారులు. అసలు అలా ఏ తల్లిదండ్రులైనా చేయగలుగుతారా.? కనీసపాటి మానవత్వం లేని విధంగా అధికారులు బుకాయింపులకు దిగుతున్నారు.

అంబులెన్సులు ప్రారంభిస్తే పబ్లిసిటీ స్టంట్లు.. ఇంకేదన్నా చేస్తే పబ్లిసిటీ స్టంట్లు.. మేటర్ వీక్‌గా వున్నప్పుడే పబ్లిసిటీ పీక్స్‌లో వుంటుంది. చిన్నారి మృతదేహాన్ని 120 కిలోమీటర్ల దూరం తల్లిదండ్రులు ద్విచక్ర వాహనం మీద తరలించిన వార్త దేశ వ్యాప్తంగా పెను దుమారానికి కారణమవుతోంది. రాష్ట్రంలో మానవత్వం లేని ప్రభుత్వం వుందంటూ విమర్శలు వెల్లువెత్తుతున్నాయి.

ఈ నేపథ్యంలోనే ఫ్యాక్ట్ చెక్ రంగంలోకి దిగింది. వైద్య శాఖ అధికారుల వివరణ.. అంటూ, ఈ పాపాన్ని బాధిత తల్లిదండ్రుల మీద నెట్టేసింది ఫ్యాక్ట్ చెక్. ఇది ఫ్యాక్ట్ చెక్ కాదు. ఫేక్ చెక్ అంటున్నారు నెటిజన్లు. కళ్ళ ముందు వాస్తవం కనిపిస్తున్నా, కాదు కాదు.. మీకు కనిపిస్తున్నది అబద్ధం.. మేం చెబుతున్నదే నిజం.. అని చెప్పించడం వైసీపీకి కొత్త కాదు. ఆ వైసీపీ అధికారంలో వున్నప్పుడు అధికార యంత్రాంగం కూడా అవాస్తవాల్నే వాస్తవాలుగా బుకాయించక ఇంకేం చేస్తుంది.?

వైఎస్ వివేకానందరెడ్డి అత్యంత కిరాతకంగా చంపబడితే, ‘గుండె పోటుతో చనిపోయారు’ అని చెప్పినోళ్లు.. ఈ ఘటనలో చిన్నారి తల్లిదండ్రులదే తప్పని చెప్పక ఇంకెలా చెబుతారు.? ఇంకా నయ్యం.. ‘మేం వైద్య చికిత్స అందించేలోపే చిన్నారి తొందరపడి చనిపోయింది’ అని వైద్యాధికారులు చెప్పలేదు. ఏమో, చెప్పినా చెబుతారు. ఫ్యాక్ట్ చెక్ నిర్వాహకులకు ఈ ఐడియా రాలేదేంటబ్బా.?