జన్మంతా జగన్‌తోనేనంటున్న విజయసాయిరెడ్డి.. నమ్మొచ్చంటారా.?

‘వైఎస్‌ రాజశేఖర్‌రెడ్డితో నాకున్న అనుబంధం చాలా విలువైనది. ఇప్పుడు వైఎస్‌ జగన్‌ మోహన్‌రెడ్డితోనూ అదే అనుబంధం కొనసాగుతోంది. ఇకపైనా, అదే కొనసాగుతుంది. జన్మంతా జగన్‌ వెంటే నా ప్రయాణం. ఇందులో ఇంకో మాటకు తావు లేదు. వైఎస్‌ జగన్‌కీ నాకూ మధ్య చిచ్చు పెట్టేందుకు చాలా ప్రయత్నాలు జరుగుతున్నాయి. అలా చిచ్చుపెట్టే ప్రయత్నంలో పైశాచిక ఆనందాన్ని పొందుతున్న టీడీపీ శ్రేణులు, టీడీపీ అనుకూల మీడియా గురించి పట్టించుకోవాల్సిన అవసరం లేదు..’ అంటూ వైసీపీ ఎంజీ (రాజ్యసభ) విజయసాయిరెడ్డి తాజాగా చేసిన వ్యాఖ్యలు రాజకీయ వర్గాల్లో చర్చనీయాంశంగా మారాయి.

రాజకీయాల్లో శాశ్వత మిత్రులు, శాశ్వత శతృవులు ఎవరూ వుండరు. ఈ రోజు ఈక్వేషన్స్‌ రేపు ఇంకోలా మారిపోవచ్చు. ఏపీ అసెంబ్లీ స్పీకర్‌ తమ్మినేని సీతారాం.. ఒకప్పుడు టీడీపీ అధినేత చంద్రబాబుకి అత్యంత సన్నిహితుడు. ‘నేను చనిపోయాక నా పార్తీవ దేహం మీద టీడీపీ జెండానే కప్పాలి..’ అని ఓ సందర్భంలో చెప్పారాయన. చెప్పుకుంటూ పోతే, ఇలాంటోళ్ళ రాజకీయాల్లో చాలామందే కన్పిస్తారు. కానీ, కాలం ఎప్పుడూ ఒకేలా వుండదు. కీలకమైన నిర్ణయాలు తీసుకోవాల్సి వస్తుంటుంది. అప్పటిదాకా పొగిడిన వాళ్ళనే, ఆ తర్వాత విమర్శించాల్సి వస్తుంది.

ఇక, విజయసాయిరెడ్డి విషయానికొస్తే.. ఎవరు ఔనన్నా ఎవరు కాదన్నా ఆయన, వైఎస్‌ జగన్‌ మోహన్‌రెడ్డికి అత్యంత సన్నిహితుడు. వైఎస్సార్సీపీలో నెంబర్‌ టూ పొజిషన్‌ ఆయనది. అయితే, ఇటీవలి కాలంలో జగన్‌ – విజయసాయిరెడ్డి మధ్య వ్యవహారం చెడిందనే గుసగుసలు మాత్రం గట్టిగానే విన్పిస్తున్నాయి. నిప్పు లేకుండానే పొగ వస్తోందా.? అన్నదీ ఆలోచించాల్సిన వ్యవహారమే.

ఆ మాటకొస్తే, విజయసాయికీ, జగన్‌కీ మధ్య గతంలోనే చెడిందనీ, విజయసాయిరెడ్డి ‘అప్రూవర్‌గా’ మారబోతున్నాడంటూ, వైఎస్‌ జగన్‌ అక్రమాస్తుల కేసుపై అప్పట్లో ‘బ్రేకింగ్‌ న్యూస్‌లు’ తెలుగు మీడియాలో కన్పించాయి. మళ్ళీ ఇప్పుడు, విజయసాయిరెడ్డి చుట్టూ ఈ తరహా గుసగుసలొస్తున్నాయి. ఆ గుసగుసల్ని విజయసాయిరెడ్డి ఖండిస్తున్నప్పటికీ, వైసీపీలో ఆయన ఇమేజ్‌కి ‘డ్యామేజ్‌’ అంతే బాగానే జరిగినట్లు కన్పిస్తోందన్నది రాజకీయ వర్గాల్లో జరుగుతున్న చర్చ.