టెస్టింగ్‌ టైమ్స్: ‘ఫెయిల్డ్‌ తెలంగాణ’ అంటున్నారు కేసీఆర్‌ సారూ.!

కేంద్రం, మద్యం షాపుల్ని తెరుచుకునేందుకు అనుమతివ్వడానికి ముందు.. ఆ తర్వాత.. ఇలా తెలంగాణలో కరోనా పరిస్థితి గురించి చెప్పుకోవాలేమో. దేశంలో ఏ రాష్ట్రంలోనూ లేని విధంగా తెలంగాణలో కరోనా వైరస్‌ని కట్టడి చేయగలిగింది కేసీఆర్‌ సర్కార్‌. కానీ, ఇది ఒకప్పటి మాట. ఇప్పుడు పరిస్థితులు మారిపోయాయ్‌. పొరుగు రాష్ట్రం ఆంధ్రప్రదేశ్‌లో మద్యం షాపులు తెరవగానే, తెలంగాణ సరిహద్దుల నుంచి ఆంధ్రప్రదేశ్‌ వైపు పోటెత్తారు మందుబాబులు. ఇక, అక్కడి నుంచి అసలు కథ మొదలైంది. తెలంగాణలోనూ మద్యం షాపులు తెరుచుకున్నాయి. క్రమక్రమంగా తెలంగాణలో కరోనా వ్యాప్తి పెరుగుతూ వచ్చింది.

తెలంగాణ నుంచి ఆంధ్రప్రదేశ్‌కి వెళ్ళడానికి అనుమతి తప్పనిసరి. అదే ఆంధ్రప్రదేశ్‌ నుంచి తెలంగాణకు రావడానికి ఎలాంటి అనుమతులూ అవసరం లేదు. తెలంగాణ ప్రభుత్వం అంతలా వెసులుబాట్లు కల్పించింది. దాంతో, ఆ వెసులుబాట్లను జనం కూడా దుర్వినియోగం చేశారు. మరోపక్క, తెలంగాణలో కరోనా పరీక్షలు తక్కువగా జరుగుతున్నాయనే విమర్శలు రోజురోజుకీ పెరిగిపోతున్నాయి.

ఆంధ్రప్రదేశ్‌లో మాత్రం, ప్రతిరోజూ అటూ ఇటూగా 10 వేల పరీక్షలు జరుగుతోంటే, తెలంగాణలో అది కేవలం వందల సంఖ్యలోనే వుంది. ఇప్పటికీ తెలంగాణలో మొత్తం పరీక్షల సంఖ్య కేవలం 50 వేలకు అటూ ఇటూగానే వుందంటే పరిస్థితి ఎలా వుందో అర్థం చేసుకోవచ్చు. ఎందుకిలా.? తెలంగాణలో కరోనా పరీక్షలు తక్కువగా జరగడంపై విపక్షాలు ప్రశ్నించినప్పుడు, ‘ఎక్కువ పరీక్షలు చేస్తే బహుమతులేవీ రావు..’ అని పలువురు మంత్రులే ఎగతాళి చేశారు. కానీ, పరీక్షలు ఎక్కువ చేస్తేనే కదా.. రాష్ట్రంలో కరోనా వాస్తవ పరిస్థితి ఏంటో తెలిసేది.?

తమిళనాడు తదితర రాష్ట్రాల్లో 20 వేలకు పైగా పరీక్షలు ఒక్కరోజులో జరిగిన సందర్భాలున్నాయి. మరి, ఆ స్థాయిలో తెలంగాణలోనూ పరీక్షలు జరిగితే, కేసుల సంఖ్య అనూహ్యంగా పెరుగుతుంది కదా.! టెస్టింగ్స్‌ పెంచాలంటూ హైకోర్టు ఆదేశించినా, తెలంగాణ ప్రభుత్వం ఆ దిశగా అడుగులు వేస్తున్నట్లు కన్పించడంలేదు. మరోపక్క, కరోనా చికిత్సకు ప్రధాన కేంద్రం అయిన గాంధీ ఆసుపత్రిపై అనేక ఆరోపణలు వెల్లువెత్తుతున్నాయి.

కరోనా కోసమే ప్రత్యేకంగా టిమ్స్ ఆసుపత్రిని ప్రారంభించామని చెప్పుకున్న కేసీఆర్‌ సర్కార్‌.. ఎందుకిలా ఇప్పుడు విమర్శలకు అవకాశమిస్తోంది కరోనా విషయంలో.? ఒకప్పుడు తెలంగాణలో ‘మేం సేఫ్‌’ అని తెలంగాణ ప్రజానీకం భావించింది. కానీ, ఇప్పుడు అదే ప్రజానీకం, ‘తెలంగాణ ఫెయిల్డ్‌’ అంటూ హ్యాష్‌ ట్యాగ్‌లతో హోరెత్తిస్తోంది సోషల్‌ మీడియాలో. మరి, తాజా పరిస్థితులు, పరిణామాలపై తెలంగాణ ముఖ్యమంత్రి పెదవి విప్పుతారా.? వేచి చూడాల్సిందే.