ఇదేం ప్రశ్న.. హనుమంతుడు ఆంధ్రోడా.?

‘తెలంగాణ రాముడు’ అంటూ భద్రాద్రి రాముడి గురించిన చర్చ కొందరిలో జరుగుతోంది. అదేంటీ, ఏ దేవుడైనా అందరివాడే కదా.? మరి, కొందరివాడిగా దేవుడ్ని చూడటమేంటి.? అదే మరి, పైత్యమంటే.

హనుమంతుడి జన్మస్థలం ఇదేనంటూ అంజనాద్రి పేరుని తెరపైకి తెచ్చింది టీటీడీ. ఇందుకు తగ్గ ఆధారాల్ని శ్రీరామనవమి సందర్భంగా ప్రకటించింది తిరుమల తిరుపతి దేవస్థానం. కలియుగ ప్రత్యక్ష దైవం కొలువైన తిరుమల గిరుల్లో ఒకటైన అంజనాద్రిని హనుమంతుడి జన్మస్థలంగా ప్రకటించాక.. హనుమంతుడు ఆంధ్రోడే.. హనుమంతుడు మన తెలుగోడే.. అనే చర్చ సోషల్ మీడియాలో షురూ అయ్యింది.

ఇప్పుడంటే ఆంధ్ర, తెలంగాణ, తమిళనాడు.. ఇలా వున్నాయేమోగానీ.. ఒకప్పుడు పాపం దేవుళ్ళకి అవన్నీ తెలియవు కదా. ఇప్పుడు జనం ‘మా తెలుగోడు.. మా తెలంగాణోడు..’ అని చెప్పుకుంటోంటే, దేవుళ్ళకు ఏం చేయాలో పాలుపోని పరిస్థితి వచ్చే వుంటుంది. హనుమంతుడి జన్మస్థలానికి సంబంధించి చాలా చాలా వాదనలున్నాయి. స్థల పురాణాల ప్రకారం ఒక్కో దేవాలయం ఒక్కో విషయం చెబుతుంటుంది. అయోధ్యని రామజన్మభూమి.. అంటాం. కాదంటూ ఆ మధ్య నేపాల్ వాదించింది. ఎవరి గోల వారిదే. ఇక్కడ దేవుడు ఎక్కడ పుట్టాడు.? అన్న చర్చ అనవసరం.

ఆ చర్చతో ఎవరికీ ఉపయోగం లేదు. దేవుడంటేనే ఓ నమ్మకం. ఆ నమ్మకాన్ని చెడగొట్టే ప్రయత్నాలు ఎవరు చేసినా, ఏ మతానికి సంబంధించిన దేవుళ్ళ మీద చేసినా అది నూటికి నూరుపాళ్ళూ మహా పాపం మాత్రమే కాదు, పెద్ద నేరంగా కూడా పరిగణించాల్సిందేనేమో. తిరుమల తిరుపతి దేవస్థానం, అంజనాద్రిని హనుమంతుడి జన్మస్థలంగా ప్రకటించడాన్ని ఆహ్వానించాల్సిందే. అదే సమయంలో, వేరే ప్రాంతాలకు సంబంధించి హనుమంతుడి జన్మస్థలం.. అన్న వాదనల నేపథ్యంలో వివాదాలు తలెత్తే ఆస్కారముందని టీటీడీనీ చెబుతూ, శ్రీవారి దయతో ఆ వివాదాలేవీ రాకుండా వుండాలని ఆకాంక్షించడం గమనార్హం.