కార్మికోద్యమ నేత.. నాయిని కన్నుమూత

తెలంగాణ మాజీ హోంమంత్రి, కార్మికోద్యమ నేత నాయిని నర్సింహారెడ్డి కన్నుమూశారు. ఇటీవల కరోనా బారిన పడిన ఆయన.. అందుకు చికిత్స తీసుకుని కోలుకున్నారు. అయితే, అనంతరం లంగ్స్ ఇన్ఫెక్షన్ కి గురికావడతో న్యుమోనియా సోకింది. ఈ క్రమంలో గత కొన్ని రోజులుగా హైదరాబాద్ లోని జూబ్లీహిల్స్ అపోలో ఆస్పత్రిలో చికిత్స పొందుతున్నారు. రెండు రోజులుగా ఆయన పరిస్థితి విషమంగానే ఉంది.

ఈ నేపథ్యంలో బుధవారం సాయంత్రం సీఎం కేసీఆర్ ఆస్పత్రికి వెళ్లి నాయిని ఆరోగ్య పరిస్థితిపై వైద్యులను వివరాలు అడిగి తెలుసుకున్నారు. ఆయన కుటుంబ సభ్యులకు ధైర్యం చెప్పి వచ్చారు. అనంతరం అర్ధరాత్రి దాటిన తర్వాత నాయిని పరిస్థితి మరింత విషమంగా మారింది. ఆయన్ను కాపాడటానికి వైద్యులు చేసిన ప్రయత్నాలు ఫలించలేదు.

నాయినికి భార్య అహల్యతోపాటు కుమారుడు, కుమార్తె ఉన్నారు. నాయిని అల్లుడు శ్రీనివాసరెడ్డి రాంనగర్ డివిజన్ కార్పొరేటర్. సోషలిస్టు పార్టీతో రాజకీయ ప్రస్థానం ప్రారంభించిన నాయిని.. పేదలకు అండగా నిలిచేవారు. ముఖ్యంగా కార్మికుల పక్షాన అలుపెరగని పోరాటం చేశారు. ఎవరికి ఏ ఆపద వచ్చినా వారికి భరోసా కల్పించేవారు. హైదరాబాద్ వీఎస్టీలో తిరుగులేని ముద్ర వేశారు. అనంతరం ముషీరాబాద్ నియోజకవర్గం నుంచి మూడుసార్లు ఎమ్మెల్యేగా ఎన్నికయ్యారు.

ప్రత్యేక తెలంగాణ ఉద్యమంలో తనదైన పాత్ర పోషించారు. ఉద్యమంలో టీఆర్ఎస్ అధినేత కేసీఆర్ వెన్నంటే ఉన్నారు. వైఎస్ హయాంలో సాంకేతిక విద్యాశాఖ మంత్రిగా పనిచేసిన నాయిని.. ప్రత్యేక తెలంగాణ వచ్చిన తర్వాత ఎమ్మెల్సీగా ఎన్నికై కేసీఆర్ కేబినెట్ లో హోంమంత్రిగా బాధ్యతలు నిర్వర్తించారు.

అయితే, మొన్నటి అసెంబ్లీ ఎన్నికల్లో కేసీఆర్ తనకు ప్రాధాన్యత ఇవ్వకపోవడంతో ఆయన కొద్దిరోజులు అలకబూనారు. ముషీరాబాద్ ఎమ్మెల్యే టికెట్ ను తన అల్లుడు శ్రీనివాసరెడ్డికి ఇప్పించుకోవడం కోసం తీవ్రంగా ప్రయత్నించినా.. కేసీఆర్ సుముఖత వ్యక్తంచేయలేదు. దీంతో కొద్దిగా అలకబూనినా.. తర్వాత సర్దుకున్నారు. కాగా, నాయిని మరణం పట్ల కార్మిక సంఘాలు, టీఆర్ఎస్ శ్రేణులు దిగ్భ్రాంతి వ్యక్తంచేశాయి.