జనసేనకి అన్నీ అలా కలిసొస్తున్నాయంతే.!

జనసేన అధినేత పవన్ కళ్యాణ్ ఎక్కడ.? తెలంగాణ అసెంబ్లీ ఎన్నికల నేపథ్యంలో జనసేనాని పవన్ కళ్యాణ్, ‘వారాహి యాత్ర’ని తెలంగాణలో చెయ్యాలి కదా.? ఇలా పలు ప్రశ్నలు తెలంగాణ రాజకీయాల్లో వినిపిస్తున్నాయి.

తెలంగాణ అసెంబ్లీ ఎన్నికల్లో పోటీ చేస్తున్నట్లు జనసేన ఇప్పటికే ప్రకటించింది. దాదాపు 32 నియోజకవర్గాల్లో ఇన్‌ఛార్జిల నియామకం కూడా జరిగింది. అభ్యర్థుల ప్రకటనే ఆలస్యం.. కార్యకర్తలైతే రంగంలోకి దిగిపోయారు. ప్రచార కార్యక్రమాలూ నిర్వహిస్తున్నారు.

అయితే, పొత్తు కోసం బీజేపీనే, జనసేన వద్దకు వెళ్ళింది. ఈ నేపథ్యంలో సీట్ల పంచాయితీ ఓ కొలిక్కి రావాల్సిందే. ఇలా సీట్ల విషయమై స్పష్టత వస్తే, ఆ వెంటనే.. అభ్యర్థుల ప్రకటన.. ప్రచారం.. ఇవన్నీ చకచకా జరిగిపోతాయ్.

బీజేపీతో పొత్తు వుంది గనుక, టీడీపీ నుంచి కూడా మద్దతు వుంది గనుక, చెప్పుకోదగ్గ ఫలితాల్ని ఈసారి తెలంగాణలో జనసేన సాధించే అవకాశాలైతే లేకపోలేదు. అది, ఆంధ్రప్రదేశ్‌లో త్వరలో జరిగే అసెంబ్లీ ఎన్నికలకు జనసేనకు మరింత ఊపునిస్తుందని రాజకీయ విశ్లేషకులు అభిప్రాయపడుతున్నారు.
‘తెలంగాణలో కనీసం రెండు మూడు సీట్లు గెలుచుకున్నా అది జనసేన పార్టీకి అడ్వాంటేజ్ అవుతుంది. అదే, ఐదు సీట్లు గెలవగలిగితే మాత్రం.. అది అనూహ్య విజయమే..’ అన్నది రాజకీయ పరిశీలకుల వాదన. అది నిజం కూడా.!

ఆంధ్రప్రదేశ్‌లోనూ టీడీపీ – జనసేన పొత్తు ఖాయమైంది. ఈ కూటమితో బీజేపీ కలవడంపై కొంత గందరగోళం వుంది. అది కూడా, తెలంగాణ అసెంబ్లీ ఎన్నికల పోలింగ్ లోపు తేలిపోవచ్చు. ఎలా చూసినా, అన్నీ జనసేనకు కలిసొస్తున్నాయ్.! జనసేన – టీడీపీ – బీజేపీ కూటమిలో ఒకప్పుడు టీడీపీ పెద్ద పార్టీ అయితే, ఇప్పుడు జనసేన పెద్ద పార్టీగా అవతరించేలా వుంది పరిస్థితి.