ఈ దీపావళికి బాణాసంచాపై నిషేధం.. సబబే: సుప్రీంకోర్టు

దేశంలోని పండగల నిర్వహణ, ప్రజారోగ్యంపై సుప్రీంకోర్టు కీలక వ్యాఖ్యలు చేసింది. దీపావళి పండుగకు బాణాసంచా కాల్చడంపై నిషేధం విధించడాన్ని సవాల్‌ చేస్తూ దాఖలైన పిటిషన్‌పై సుప్రీంకోర్టు స్పందించింది. దీపావళికి బాణాసంచాపై నిషేధం విధించాలంటూ పశ్చిమ బెంగాల్‌ హైకోర్టు ఇచ్చిన తీర్పుపై సుప్రీంకోర్టులో దాఖలైన ఓ పిటిషన్‌ పై న్యాయమూర్తి డీవై. చంద్రచూడ్ పలు వ్యాఖ్యలు చేశారు.

‘పండుగలు జరుపుకోవడం కంటే ప్రజారోగ్యం, వారి జీవితాలు ఎంతో ముఖ్యమైనవి. పండుగలు, సంప్రదాయాలు మన సంస్కృతిలో భాగమైనా.. ప్రస్తుతం మనం కరోనాతో పోరాడుతున్నాం. ఈ సమయంలో అత్యంత జాగ్రత్తగా ఉండాలి. ప్రజల ప్రాణాలు కాపాడుకోవాలి. ఈ సమయంలో దీపావళి పండుగకు బాణాసంచా కాల్చడంపై నిషేధం విధించడం సబబే. ఈ సమయంలో అందరూ కలిసికట్టుగా మద్దతు ఇవ్వాలి’ అని అన్నారు. ఈమేరకు సుప్రీంకోర్టు ముందుకు వచ్చిన ఈ పిటిషన్ ను సుప్రీంకోర్టు తోసిపుచ్చింది.

దేశంలో కరోనా కేసులు తగ్గినా తీవ్రత తగ్గలేదు. అమెరికా, ఫ్రాన్స్ వంటి దేశాల్లోని పరిస్థితులే ఇందుకు ఉదాహరణ. కరోనా తీవ్రత ఉండగానే దేశంలో చలికాలం, పండుగ సీజన్లు వచ్చేశాయి. ఈ సీజన్లో దీపావళి పండగకు ఎంతో ప్రాముఖ్యం ఉంది. టపాసులు కాల్చడం అంటే.. చిన్నా పెద్దా తేడా లేకుండా సంతోషంగా, సంబరంగా పండగ జరుపుకుంటారు. ప్రస్తుత పరిస్థితుల్లో దేశంలోని చాలా రాష్ట్రాలు దీపావళి పండగ నిర్వహణపై నిషేధం విధించింది. ఏపీలో రాత్రి 8 నుంచి10 లోపు పండగ జరుపుకోవాలని ఉత్తర్వులు జారీ చేసింది.