ఇదిగో శ్రీదేవి.. అతిలోక సుందరికి మరణం లేదు.!

అతిలోక సుందరికి మరణం వుంటుందా.? ‘జగదేక వీరుడు అతిలోక సుందరి’ సినిమాలో ఆమెని దేవ కన్యగా చూపించిందే నిజం. ఆమె నిజంగానే దేవ కన్య. భూమ్మీదకు వచ్చి, చాన్నాళ్ళపాటు ప్రేక్షకుల్ని అలరించి.. మళ్ళీ దివికేగింది. ఆ సంగతి పక్కన పెడితే, తాజాగా మేడమ్‌ టుస్సాడ్స్‌ మ్యూజియంలో శ్రీదేవి మైనపు విగ్రహాన్ని ఏర్పాటు చేశారు. విగ్రహంలో సజీవ కళ ఉట్టిపడేలా తయారు చేయడం మేడమ్‌ టుస్సాడ్స్‌ నిర్వాహకుల ప్రత్యేకత.

ఇప్పటికే ఎన్నో విగ్రహాలు మేడమ్‌ టుస్సాడ్స్‌లో కొలువు దీరాయి. అందులో మన తెలుగు ప్రముఖులకి చెందిన విగ్రహాలు కూడా వున్నాయనుకోండి.. అది వేరే విషయం. బాలీవుడ్‌ నుంచి కొత్త తరం హీరోయిన్లకు చెందిన మైనపు విగ్రహాలకూ కొదవ లేదిక్కడ. ఎన్ని విగ్రహాలున్నా, అతిలోక సుందరి లేకపోతే.. ఆ మ్యూజియంకి పరిపూర్ణత లేనట్లే అనుకున్నారో ఏమో, నిర్వాహకులు శ్రీదేవి మైనపు విగ్రహాన్ని ఏర్పాటు చేశారు.

విగ్రహాన్ని ఎవరైనా చూస్తే, అతిలోక సుందరి జీవించి లేదన్న వాస్తవాన్ని ఒప్పుకోలేరు. అంత అద్భుతంగా ఆ విగ్రహాన్ని మలచారు. విగ్రహంతోపాటు శ్రీదేవి కుటుంబ సభ్యులు పొటో దిగితే.. ఆ ఫొటోలో శ్రీదేవి సహజత్వాన్ని చూసి.. ఆ కుటుంబం ఇంకా నిండుగా అలానే వుందనే భావన అందరికీ కలుగుతుంది. కుమార్తె జాన్వీ కపూర్‌ అయితే తన తల్లి మైనపు విగ్రహాన్ని చూసి భావోద్వేగానికి గురైంది.. ఆశ్చర్యపోయింది.. ఆ విగ్రహాన్ని తనతోపాటు తన ఇంటికి తీసుకెళ్లాలని కూడా అనుకుందట.

పెళ్ళయి, ఇద్దరు పిల్లలకు తల్లయ్యాక సినిమాలకు దూరమైపోయిన శ్రీదేవి, తిరిగి సినిమాల్లో రాణించాలని అనుకుంటున్న సమయంలో.. అనూహ్యంగా మృత్యువాత పడిన విషయం విదితమే. రీ-ఎంట్రీలో ‘పులి’, ‘ఇంగ్లీష్‌ వింగ్లీష్‌’, ‘మామ్‌’ తదితర సినిమాల్లో నటించింది శ్రీదేవి. ఆమె మరణం ఇప్పటికీ మిస్టరీనే. మరణం సంగతి పక్కన పెడితే, శ్రీదేవి.. మేడమ్‌ టుస్సాడ్స్‌లో ఇంకా సజీవంగానే కన్పిస్తోంది మైనపు విగ్రహం రూపంలో.