ఉమ్మడి ఆంధ్రప్రదేశ్ కి సంబంధించి వైఎస్సార్ అంటే అందరికీ అక్కరకొచ్చే నేస్తం.. ఎంతో మందికి ఆత్మీయ బంధువు.. వెరసి తెలుగు ప్రజల హృదయాల్లో చెదిరిపోని జ్ఞాపకం. స్నేహానికి విలువ ఇచ్చే వ్యక్తిత్వం.. శరణు కోరితే శత్రువునైనా అక్కున చేర్చుకునే తత్వం.. తాను నమ్మిన విషయంలో ఎంత దూరమైనా వెళ్లే మొండితనం.. ఒక్క వైఎస్ కే సొంతం. కాంగ్రెస్ అధిష్టానం అంటే ఎవరో మాకు తెలియదు.. మాకు సంబంధించినంత వరకు కాంగ్రెస్ పార్టీ అంటే వైఎస్సారే అని ఏపీ కాంగ్రెస్ ఎమ్మెల్యే ఓ సందర్భంలో వ్యాఖ్యానించారంటే వైఎస్ ప్రభావం ఎలా ఉండేదో అర్థం చేసుకోవచ్చు. ఉమ్మడి ఆంధ్రప్రదేశ్ లో రెండు సార్లు కాంగ్రెస్ ను ఒంటి చేత్తో అధికారంలోకి తెచ్చిన ఘనత నిస్సందేహంగా రాజశేఖరరెడ్డిదే. ఐదేళ్ల మూడు నెలల పాలనలో ఆంధ్రప్రదేశ్ ప్రజల హృదయాలను గెలుచుకుని ఉవ్వెత్తున కెరటంలా ఎగసిన ఆయన.. అకస్మాత్తుగా హెలికాప్టర్ ప్రమాదంలో అసువులు బాసి నేటికి పదేళ్లు పూర్తయింది. ఈ సందర్భంగా ఆ మహానేత ప్రస్థానంపై ప్రత్యేక కథనం.
ఓటమి ఎరుగని ధీరుడు..
1949 జూలై 8న కడప జిల్లా పులివెందులలో జన్మించిన వైఎస్.. ఎంబీబీఎస్ పూర్తి చేసి జమ్మలమడుగు ఆస్పత్రిలో కొంతకాలం పనిచేశారు. అనంతరం 1978లో క్రియాశీలక రాజకీయాల్లోకి అడుగుపెట్టిన రాజన్న.. అదే ఏడాది పులివెందుల నియోజకవర్గం నుంచి ఎమ్మెల్యేగా గెలిచి మంత్రిగా బాధ్యతలు చేపట్టారు. 1983లో ఎన్టీఆర్ ప్రభంజనంలోనూ విజయం సాధించారు. దీంతో ఆయనలోని నాయకత్వ లక్షణాలను గుర్తించిన అప్పటి ప్రధాని ఇందిరాగాంధీ.. వైఎస్సార్ ను ఏపీ కాంగ్రెస్ అధ్యక్షుడిగా నియమించారు. అనంతరం 1989 నుంచి 1999 వరకు నాలుగు సార్లు కడప లోక్ సభ స్థానం నుంచి వరుసగా విజయం సాధించారు. 1998 నుంచి 2000 సంవత్సరం వరకు మళ్లీ ఏపీ కాంగ్రెస్ సారథి బాధ్యతలు నిర్వర్తించారు. 1999, 2004, 2009ల్లో మళ్లీ ఎమ్మెల్యేగా ఎన్నికయ్యారు. ఆయన తన జీవితకాలంలో పోటీ చేసిన ఏ ఒక్క ఎన్నికల్లో కూడా ఓడిపోలేదు.
1999 ఎన్నికల్లో వైఎస్ నేతృత్వంలోని కాంగ్రెస్ పార్టీ ఓటమి చవిచూసినా.. ఉమ్మడి ఏపీలో బాగా పట్టు సంపాదించారు. 2003 ఏప్రిల్ 9న ప్రజా ప్రస్థానం పేరుతో చేవెళ్ల నుంచి ఇచ్ఛాపురం వరకు దాదాపు 1475 కిలోమీటర్ల మేర పాదయాత్ర చేసి సంచలనం సృష్టించారు. ఆ సమయంలో వైఎస్ కు జనం జేజేలు పలికారు. తమ కష్టాలు తెలుసుకోవడానికి నాయకుడు వచ్చాడని సంబరపడ్డారు. దీంతో 2004లో జరిగిన ఎన్నికల్లో కాంగ్రెస్ పార్టీ భారీ మెజార్టీతో అధికారంలోకి వచ్చింది. సీఎంగా ప్రమాణ స్వీకారం చేసిన వెంటనే రైతులకు ఉచిత విద్యుత్ అందించే ఫైలుపై సంతకం చేసి శెభాష్ అనిపించుకున్నారు. తర్వాత ఆరోగ్యశ్రీ, 108, రూ.2కే కిలో బియ్యం, ఫీజు రీయింబర్స్ మెంట్ వంటి పథకాలతోపాటు రైతుకు అవసరమైన పలు సాగునీటి ప్రాజెక్టులను చేపట్టి యుద్ధప్రాతిపదికన పూర్తిచేశారు.
ముక్కోణపు పోరులోనూ విజేత..
తొలి విడత పాలన చివరికి వచ్చేసరికి కొన్ని విషయాల్లో వైఎస్ ప్రభుత్వంపై కాస్త వ్యతిరేకత వచ్చింది. అదే సమయంలో మెగాస్టార్ చిరంజీవి ప్రజారాజ్యం పార్టీ స్థాపించి రాజకీయారంగేట్రం చేశారు. దీంతో ఏపీలో ముక్కోణపు పోరు అనివార్యమైంది. ప్రజా వ్యతిరేకతను ఎదుర్కొని గెలవగలమా అనే సందేహం అటు పార్టీ అధిష్టానంలో నెలకొంది. అయితే, వైఎస్ మాత్రం చాలా నిబ్బరంగా ఉన్నారు. గెలుపైనా, ఓటమైనా తనదే బాధ్యత అని.. తనపై నమ్మకం ఉంచాలని అధిష్టానాన్ని కోరారు. తన వ్యూహాలతో ప్రత్యర్థుల్ని చిత్తు చేసి వరుసగా రెండోసారి కాంగ్రెస్ పార్టీని ఒంటి చేత్తో అధికారంలోకి తెచ్చారు. అయితే, 2004లో వచ్చినన్ని సీట్లు రాలేదు. కేవలం 156 స్థానాలు మాత్రమే పరిమితమైంది. దీంతో తమకు ప్రజలు కేవలం పాస్ మార్కులు మాత్రమే వేశారని. ఈ సారి మరింత కష్టపడి పనిచేయాలని ఎలాంటి భేషజాలు లేకుండా వ్యాఖ్యానించారు.
రెండోసారి సీఎంగా ప్రమాణ స్వీకారం చేసిన ఆయన.. మూడు నెలలకే 2009 సెప్టెంబర్ 2న రచ్చబండ కార్యక్రమంలో పాల్గొనేందుకు వెళుతూ హెలికాప్టర్ ప్రమాదంలో కన్నుమూశారు. ఆయన ప్రయాణిస్తున్న హెలికాప్టర్ నల్లమల అటవీ ప్రాంతంలో పావురాల గుట్టపై కూలిపోగా.. మరుసటి రోజు హెలికాప్టర్ శకలాలు గుర్తించారు. దీంతో రాష్ట్రం ఒక్కసారిగా మూగబోయింది. రాజన్న లేడనే నిజం జీర్ణించుకోలేక వందలాది గుండెలు ఆగిపోయాయి. వైఎస్ మరణంతోనే రాష్ట్రంలో కాంగ్రెస్ పార్టీ వైభవం కూడా కొడిగట్టింది. ఆ తర్వాత వచ్చినవారు ఎవరూ కూడా వైఎస్ ను మరిపించేలా పాలన చేయలేకపోయారు. ఆయన పాలనలో దాదాపుగా రాష్ట్రంలోని ప్రతి కుటుంబం ఏదో ఒక లబ్ధి పొందిందంటే అతిశయోక్తి కాదు. అందుకే.. రాజన్న ఎక్కడికీ పోలేదు. కుయ్ కుయ్ కుయ్ మనే 108 సైరన్ లో కనిపిస్తారు. ఆరోగ్యశ్రీ చికిత్సలో అగుపిస్తారు. ఫీజు రీయింబర్స్ మెంట్ పథకంలో ప్రతిఫలిస్తారు.. వెరసి ప్రజల గుండెల్లో భద్రంగా ఒదిగిపోయారు.
757377 914306Hey there! Good stuff, do keep us posted when you finally post something like that! 430858
737126 120502Hello! I just wish to give an enormous thumbs up for the great info you might have right here on this post. I can be coming once more to your weblog for a lot more soon. 861870