సుబ్రతారాయ్ కు సెబీ షాక్.. రూ. 62,600 కోట్లు చెల్లించాల్సిందే

సహారా గ్రూప్ సంస్థల అధినేత సుబ్రతా రాయ్ కు మార్కెట్ నియంత్రణ సంస్థ సెబీ షాక్ ఇచ్చింది. ఆయన తక్షణమే రూ.62,600 కోట్లు చెల్లించేలా ఆదేశాలివ్వాలంటూ సుప్రీంకోర్టును ఆశ్రయించింది. ఒకవేళ డబ్బు జమ చేయకుంటే ఆయన పెరోల్ ను రద్దు చేయాలని కోరింది. ఈ మేరకు శుక్రవారం సర్వోన్నత న్యాయస్థానంలో స్పెషల్ లీవ్ పిటిషన్ దాఖలు చేసింది.

2012, 2015లో సుప్రీంకోర్టు ఇచ్చిన ఆదేశాలను సహారా గ్రూప్ పాటించలేదని పేర్కొంది. రుణ మొత్తం పెరుగుతున్నా పట్టించుకోవడంలేదని తెలిపింది. తక్షణమే ఆ బకాయిల మొత్తం జమచేసేలా ఆదేశించాలని, అలా చేయని పక్షంలో ఆయన పెరోల్ రద్దు చేయాని విన్నించింది. సహారా ఇండియా రియల్ ఎస్టేట్ కార్పొరేషన్ లిమిటెడ్, సహారా హౌసింగ్ ఇన్వెస్ట్ మెంట్ కార్పొరేషన్ లిమిటెడ్ లు దాదాపు 3 కోట్ల మంది నుంచి దాదాపు రూ.25,780 కోట్లు సేకరించాయి. ఇందుకు సంబంధించిన పత్రాలను సెబీకి ఇవ్వలేదు.

అయితే, అలా సేకరించడం నిబంధనలకు విరుద్ధమని సెబీ స్పష్టంచేసింది. దీంతో ఈ వ్యవహారం సుప్రీంకోర్టుకు వెళ్లింది. వెంటనే ఆ మొత్తాన్ని ఇన్వెస్టర్లకు తిరిగి చెల్లించాలని 2012లో సుప్రీంకోర్టు ఆదేశించింది. అయినప్పటికీ సహారా గ్రూప్ ఆ డబ్బు చెల్లించలేదు. దీంతో సహారా అధినేత సబ్రతారాయ్, మరికొంతమంది బాధ్యులను కస్టడీలోకి తీసుకోవాలని సుప్రీంకోర్టు స్పష్టంచేసింది. దీంతో రెండేళ్లపాటు జైలులో ఉన్న సుబ్రతా రాయ్, మరో ఇద్దరు డైరెక్టర్లు 2016లో బెయిల్ పై విడుదలయ్యారు.

మరోవైపు ఆ రూ.25,780 కోట్ల మొత్తం ప్రస్తుతం రూ.62,600 కోట్లకు చేరింది. ఈ నేపథ్యంలో ఈ ఏడాది ఫిబ్రవరిలో సహారా గ్రూప్ రూ.15,448 కోట్లు జమ చేసింది. ఆ తర్వాత ఎలాంటి చెల్లింపులు జరపకపోవడంతో సెబీ మరోసారి న్యాయస్థానానిక వెళ్లింది. అయితే, ఇన్వెస్టర్లకు ఇవ్వాల్సిన మొత్తాన్ని తాము చెల్లించేశామని, సెబీ కావాలనే 15 శాతం వడ్డీ కలిపిందని సహారా గ్రూప్ పేర్కొంటోంది. దీనిపై న్యాయస్థానం ఎలా స్పందిస్తుందో చూడాలి.