‘బ్యాక్ గ్రౌండ్ ఉన్నా టాలెంట్ కావాలి.. ప్రేక్షకుల్ని మెప్పించాలంటే ఎప్పుడూ కష్టపడాలి.. సినిమా సినిమాకీ రాటు దేలాలి.. మొత్తంగా నటుడిగా నిరూపించుకోవాలి.. నిలబడాలి..’ తీవ్రమైన పోటీ ఉన్న సినీ పరిశ్రమలో ప్రతి నటుడికీ ఇది నిరంతర ప్రక్రియ. ఈ సూత్రాల్ని తూ.చ తప్పకుండా పాటిస్తున్నారు సాయితేజ్ (సాయి ధరమ్ తేజ్). తెలుగు సినిమా రారాజు.. మెగాస్టార్ చిరంజీవి ఫ్యామిలీ నుంచి ఆయన అండదండలతో సినిమా రంగంలోకి వచ్చిన హీరోల్లో సాయితేజ్ ఒకరు. మావయ్యలు తెలుగు సినిమాను శాసించి.. అశేష ప్రేక్షకాదరణ చూరగొన్నవారు. కొత్త తరంగా ప్రేక్షకుల మధ్యకు రావడానికి ఇంతకంటే పెద్ద పునాది లేదు. అయినా.. తొలి సినిమా నుంచీ తానేంటో నిరూపించుకుంటూనే ఉన్నారు. డ్యాన్స్, ఫైట్స్, కామెడీ, సెంటిమెంట్.. ఇలా ప్రతి జోనర్లో సినిమాలు చేసి ప్రేక్షకుల్ని తన టాలెంట్ తో మెప్పించిన హీరో ఆయన. నేడు సాయితేజ్ పుట్టిన రోజు.
మేనమామ చిరంజీవి తరహాలోనే..
బాలీవుడ్ లో కపూర్ ఫ్యామిలీ తర్వాత తెలుగులో మెగా ఫ్యామిలీలోనే నటులు.. హీరోలు ఎక్కువ. అందరికీ అభయహస్తం చిరంజీవి. వీరి ఫ్యామిలీ నుంచి వచ్చే హీరో ముఖ్యంగా మెప్పించాల్సింది చిరంజీవి అభిమానుల్నే. ఈ పనిని సులువుగా సాధించారు సాయితేజ్. మేనమామ చిరంజీవి పోలికలన్నట్టే.. సినిమాల్లో కూడా ఆయనకు తగ్గట్టే క్లాప్ కొట్టిన తొలి సినిమా ‘రేయ్’ కాకుండా రెండో సినిమా ‘పిల్లా నువ్వులేని జీవితం’ మొదటగా రిలీజై సక్సెస్ కూడా సాధించింది. తొలి సినిమాకు బ్యాక్ గ్రౌండ్ తో కాకుండా పక్కింటి కుర్రాడిలా దర్శకుడు వైవీఎస్. చౌదరి దృష్టిని ఆకర్షించి హీరో అయ్యారు సాయితేజ్. ఇదే ఆయన మొదటి గెలుపు. అటుపై ఆయన వెనుదిరిగి చూడలేదు. సుబ్రహ్మణ్యం ఫర్ సేల్, సుప్రీమ్, చిత్రలహరి, ప్రతిరోజూ పండగే వంటి హిట్స్ ఆయనకు ఉన్నాయి. ఆయన కెరీర్లో ప్రత్యేకం ‘రిపబ్లిక్’ సినిమా. సీరియస్ సినిమాను తనదైన నటనతో మెప్పించారు.
అవరోధం దాటి సక్సెస్..
కెరీర్ సాయితేజ్ కు ఎదురైన కష్టం బైక్ యాక్సిడెంట్. ఏకంగా చిత్రపరిశ్రమనే కలవరపెట్టిన అంశం. దానిని దాటి ‘విరూపాక్ష’తో హిట్ కొట్టి 100కోట్ల క్లబ్ టచ్ చేసారు. ‘బ్రో’ సినిమాతో అలరించారు. ఓదశలో వరుస ఫ్లాపులున్నా భయపడలేదు. నిర్మాతలూ వెనకడుగేయలేదు. సాయితేజ్ సత్తాకు ఇది నిదర్శనం. ఎవరి సినిమా విడుదలవుతున్నా సోషల్ మీడియా ద్వారా శుభాకాంక్షలు తెలియజేయడం. సమాజంపట్ల బాధ్యతగా ఉండాలని.. బైక్ ప్రయాణంలో హెల్మెట్ ధరించాలని పిలుపునివ్వడం.. ఆయనలో ఉన్న మంచి లక్షణాలు. సాయితేజ్ పై పవన్ కల్యాణ్ ప్రభావం ఎక్కువ. గురువుగా భావిస్తారు. ప్రస్తుతం సాయితేజ్ పూర్తి కమర్షియల్ కథతో ST17 సినిమా ప్రారంభించబోతున్నారు. భవిష్యత్తులో సాయితేజ్ మరిన్ని విజయాలు సాధించాలని మెగా ఫ్యామిలీ పేరు ప్రఖ్యాతుల్ని మరింతగా పెంచాలని కోరుకుంటూ పుట్టినరోజు శుభాకాంక్షలు తెలియజేస్తోంది ‘తెలుగు బులెటిన్’.